আল্লাই শেষ ভৰসা ! পানীৰ মাজতেই দোৱা বানপীড়িতৰ - Assam Flood 2024

শিলচৰ,৬ জুলাই: সমগ্ৰ ৰাজ্যত জলপ্ৰলয় । ফেনে-ফোটোকাৰে ওফন্দি উঠিছে বহু নৈ-উপনৈ । সমগ্ৰ ৰাজ্যৰ লগতে বান পৰিস্থিতিয়ে ক্ৰমাৎ জটিল ৰূপ ধাৰণ কৰিছে বৰাকতো ৷ বছৰৰ তৃতীয়টো বানে তচনচ কৰিছে বৰাক উপত্যকাৰ স্বাভাৱিক জনজীৱন ৷ কাছাৰত লক্ষাধিক লোক বানৰ কবলত পৰিছে ৷ তাৰো উপৰি বিভিন্ন ঠাইত মথাউৰিক লৈ চিন্তিত নৈ-পৰীয়া লোক ৷ এই অৱস্থাত ঈশ্বৰই একমাত্ৰ ভৰসা হৈ পৰিছে বৰাকবাসীৰ বাবে ৷ যাৰ বাবে বানৰ পৰা পৰিত্ৰাণ বিচাৰি এইবাৰ সমুহীয়া দোৱা প্ৰাৰ্থনাৰ আয়োজন কৰিছে কাছাৰৰ কাটিগড়াৰ শ শ বানাক্ৰান্ত ৰাইজে ৷  

ইতিমধ্যে বানত বুৰ গৈছে কাটিগড়াৰ প্ৰায় শতাধিক গাঁও ৷ এই অৱস্থাত ভয়াবহ বানৰ পৰা ৰক্ষা পাৱলৈ বানৰ মাজতেই কাছাৰৰ কাটিগড়া তাৰিণীপুৰত সমুহীয়া দোৱা-প্ৰাৰ্থনাৰ আয়োজন কৰে গাঁওবাসীয়ে ৷ বানৰ মাজত নাৱত বহি শ শ লোকে একেলগে আল্লাৰ ওচৰত দোৱা প্ৰাৰ্থনা কৰে ৷ দোৱাৰ পূৰ্বে এনেধৰে নাৱত বহি সকলোৱে পাঠ কৰে কোৰাণ শ্বৰিফ ৷ প্ৰলয়ংকাৰী বানৰ পৰা তেওলোকৰ মৰমৰ গাঁওখনসহ সমগ্ৰ বৰাক উপত্যকাক ৰক্ষা কৰিবলৈ আল্লাহৰ ওচৰত দোৱা কৰে বানক্ৰান্তসকলে ।