নিউ বঙাইগাঁও ৰে’লৱে কেৰেজ আৰু ৱাগন কাৰখানাত ভয়ংকৰ অগ্নিকাণ্ড - Fire in Bongaigaon

বঙাইগাঁও, ১৭ ফেব্ৰুৱাৰী : শনিবাৰে নিউ বঙাইগাঁও ৰে’লৱে কেৰেজ আৰু ৱাগন কাৰখানাত সংঘটিত হয় এক অঘটন ৷ শনিবাৰে দুপৰীয়াৰ ভাগত ৰে’লৱে কেৰেজ আৰু ৱাগন কাৰখানাৰ মূল ষ্টোৰতে সংঘটিত হয় এই ঘটনা ৷ য’ত ভাৰতীয় ৰে’লৰ বিভিন্ন মূল্যবান সামগ্ৰীৰ লগতে তেল জাতীয় সামগ্ৰী ভৰ্তি হৈ আছিল  ৷

এই অগ্নিকাণ্ডৰ ফলত কেইবা কোটি টকাৰ সামগ্ৰীৰ জ্বলি নষ্ট হৈ যায় বুলি জানিব পৰা গৈছে । বাতৰি যুগুত কৰা পৰলৈকে অগ্নিনিৰ্বাপক বাহিনীৰ লোকে এই জুই নিৰ্বাপন কৰিবলৈ চেষ্টা চলাই আছে বুলি জানিব পৰা গৈছে ৷ ইফালে এই অগ্নিকাণ্ড কেনেকৈ সংঘটিত হ’ল, সেয়া এতিয়ালৈকে পোহৰলৈ অহা নাই ৷

ইতিমধ্যে ঘটনাস্থলীত ৰে’ল আৰক্ষী, অসম আৰক্ষীৰ দল উপস্থিত হৈ আৰম্ভ কৰিছে তদন্ত । ঘটনাস্থলীত চীফ মেনেজাৰ কিশান সিঙৰ লগতে জিলাৰ আৰক্ষী অধীক্ষক স্বপ্ননীল ডেকা আৰু জিলাৰ আয়ুক্ত নৱদ্বীপ পাঠকৰ সহিতে DDMA ৰ বিষয়াসকল উপস্থিত হৈছে সকলো দিশ তন্নতন্নকৈ পৰীক্ষা কৰিছে ।

লগতে পঢ়ক : নিৰ্বাপিত হোৱা নাই জুই, গেৰুৱা বানমুৰীৰ অগ্নিকাণ্ড স্থলীত উপস্থিত হৰমীত সিং