পদ্মশ্ৰী হেমপ্ৰভা চুতীয়াৰ সৃষ্টিৰাজি সংৰক্ষণৰ বাবে চৰকাৰে নিৰ্মাণ কৰিব সংগ্ৰহালয় - Weaver Hemprabha Chutia
Published : Feb 12, 2024, 8:02 PM IST
ডিব্ৰুগড়, ১২ ফেব্ৰুৱাৰী : পদ্মশ্ৰী বঁটা লাভ কৰা মৰাণৰ হেমপ্ৰভা চুতীয়াই নিজৰ সৃষ্টিৰাজিক সংৰক্ষণৰ বাবে এটা সংগ্ৰহালয় নিৰ্মাণৰ বাবে চৰকাৰক আহ্বান জনাই আহিছিল । ইয়াৰ পাচতে চৰকাৰে পদ্মশ্ৰী বঁটা লাভ কৰা হেমপ্ৰভা চুতীয়াৰ আহ্বানক সহাঁৰি জনাই গ্ৰহণ কৰিছে এক গুৰুত্বপূৰ্ণ সিদ্ধান্ত ।
পদ্মশ্ৰী হেমপ্ৰভা চুতীয়াৰ বাসগৃহতে স্থাপন হ'ব সংগ্ৰাহলয় ৷ লগতে স্থাপন হ'ব প্ৰশিক্ষণ কেন্দ্ৰও । চলিত বৰ্ষত এহেজাৰখন তাঁতশাল বিতৰণ কৰিব চৰকাৰে । চলিত বাজেটত এই প্ৰকল্পৰ বাবে ধাৰ্য কৰিছে ১৪ কোটি টকা । কিয়নো হস্ততাঁতশালত চাৰিখনকৈ ধৰ্মগ্ৰন্থ বৈ দেশজুৰি পৰিচিত মৰাণৰ হেমপ্ৰভা চুতীয়া ৷
চাৰিখনকৈ গ্ৰন্থ ক্ৰমে নামঘোষা, গুণমালা, শ্ৰীমদ্ভাগৱত গীতা ইংৰাজী আৰু সংস্কৃতত বৈ উলিওৱাৰ বাবে তেওঁক ২০২২ বৰ্ষত অসম গৌৰৱ বঁটা আৰু ২০২৩ বৰ্ষত ভাৰত চৰকাৰে পদ্মশ্ৰী বঁটা প্ৰদান কৰিছিল । এটা সংগ্ৰহালয় নিৰ্মাণৰ বাবে হেমপ্ৰভা চুতীয়াই বিভিন্ন সময়ত চৰকাৰক অনুৰোধ কৰি তেওঁ সফল হোৱাত চৰকাৰক সংবাদ মাধ্যমৰ যোগেদি কৃতজ্ঞতা জ্ঞাপন কৰে অসম চৰকাৰলৈ ।
"মই যি আশা কৰিছিলো সেই আশা বাস্তৱত ৰূপায়িত হ'বলৈ গৈ আছে" ৷ এইদৰে এই খবৰ লাভ কৰি কয় পদ্মশ্ৰী হেমপ্ৰভা চুতীয়াই । লগতে তেওঁ চৰকাৰক এই সংগ্ৰাহলয়খনি ট্ৰাষ্টৰ তত্বাৱধানত আগবঢ়াই নিয়াৰ ব্যৱস্থা কৰিবৰ বাবে আহ্বান জনাইছে ৷
লগতে পঢ়ক : ৭৭৪.৪৭ কোটি টকাৰ ঘাটি বাজেট দাখিল বিত্তমন্ত্ৰী অজন্তা নেওগৰ