নুমলীগড়ত অৰুণাচলী সুৰাসহ ট্ৰাক জব্দ - Arunachali Liquor Seized
Published : May 21, 2024, 7:58 PM IST
গোলাঘাট, ২১ মে': এইবাৰ চিমেন্টৰ তলত সুৰা । বোকাখাতৰ নুমলীগড় তিনিআলিত আবকাৰী বিভাগে নাগালেণ্ডৰ পৰা অহা এখন ট্ৰাকখন জব্দ কৰে । NL 01 AE 5393 নম্বৰৰ ট্ৰাকখনে চিমেণ্টৰ তলত অতি কৌশলেৰে ইটানগৰৰ পৰা ডিমাপুৰলৈ কঢ়িয়াইছিল অৰুণাচলী সুৰা । পূৰ্বৰ পৰাই খাপপিটি থকা গোলাঘাট-বোকাখাতৰ আবকাৰীৰ দল এটাই চালকসহ জব্দ কৰে ট্ৰাকখন ।
নাগালেণ্ডৰ জনৈক ৰাজু নামৰ এটা কুখ্যাত সুৰা মাফিয়া এই কাণ্ডত জড়িত থকাৰ কথা স্বীকাৰ কৰিছে ট্ৰাকখনৰ চালক দিলীপ মাহাতোৱে । পিচত আবকাৰী বিভাগে ট্ৰাকখন জব্দ কৰি বোকাখাতৰ মহকুমাধিপতিৰ কাৰ্যালয়লৈ অনা হয় । উল্লেখযোগ্য যে বিভিন্ন সময়ত গোলাঘাট জিলাৰ ৩৭ আৰু ৩৯ নং ৰাষ্ট্ৰীয় ঘাইপথৰে অবৈধ অৰুণাচলী সুৰা সৰবৰাহ হৈ আহিছে । কিন্তু ৰহস্যজনক বিষয় এই যে কেনেকৈ কেইবাখনো জিলা অতিক্ৰম কৰে এই সুৰা সমূহ ?