আপুনিও হোৱাটছএপ-ফেচবুকত এটা নীলা বৃত্ত দেখা পাইছে নেকি ? ইয়াৰ কাম কি আৰু ইয়াক কেনেকৈ ব্যৱহাৰ কৰিব লাগে জানেনে ?
এ আইৰ জগতখনত প্ৰৱেশ কৰিছে মেটাই । মেটাই ইয়াৰ সকলো প্লেটফৰ্মতে ব্যৱহাৰকাৰীসকলক Llama-3 নামৰ এটা চেট বট (Chat Bot) সুবিধা প্ৰদান কৰিছে । বিগত কেইদিনমানৰ পৰা হোৱাটছএপ, ফেচবুক আৰু ইনষ্টাগ্ৰামত নীলা বৃত্ত দেখা গৈছে । মোবাইলটোত অকস্মাতে এই নীলা বৃত্তটো দেখি বহু লোক চিন্তিত হৈ পৰিছে । মোবাইলটোত দৈনিক ব্যৱহাৰ কৰি থকা প্লেটফৰ্মবোৰত দেখা পোৱা এই নীলা বৃত্তটোৰ কাম কি সেয়া বুজিব পৰা নাই বহুতে । দৰাচলতে এই নীলা বৃত্তটোৱে মেটাৰ স্মাৰ্ট এচিষ্টেণ্ট মেটা এ আইক প্ৰতিনিধিত্ব কৰে ।
এই AI সহায়ক ভাৰতৰ ব্যৱহাৰকাৰীয়ে বিনামূলীয়াকৈ ব্যৱহাৰ কৰিব পাৰিব আৰু ই ব্যৱহাৰৰ বাবে উপলব্ধ । দুমাহ পূৰ্বে মেটা এ আই মুকলি কৰা হৈছিল যদিও কেইখনমান দেশতহে ই উপলব্ধ আছিল । এতিয়া ভাৰততো ইয়াক মুকলি কৰা হৈছে ।
এ আই মডেলে কি কৰিব পাৰে ?
মেটা এ আই এটা অতি উন্নত এ আই মডেল । ই আপোনাক প্ৰশ্নৰ উত্তৰ দিব পাৰে । আপোনাৰ বাবে সমল সৃষ্টি কৰিব পাৰে, এ আই ফটো সৃষ্টি কৰিব পাৰে, পেৰাগ্ৰাফ সৃষ্টি কৰিব পাৰে আৰু ভাষা অনুবাদ কৰিব পাৰে । ইয়াক ইমেইল লিখা আৰু সমল সৃষ্টি কৰাৰ দৰে কামৰ বাবেও ব্যৱহাৰ কৰিব পাৰি । এই এ আই মডেলটো এল এল এম এ 3 মডেলৰ ওপৰত আধাৰিত, যি হৈছে বিশ্বৰ আটাইতকৈ উন্নত ভাষা মডেলবোৰৰ ভিতৰত এটা ।