ইণ্টাৰনেশ্যনেল ডেস্ক,২৮ মাৰ্চ : এক্স ব্যৱহাৰকাৰীসকলৰ বাবে এলন মাস্কৰ গুৰুত্বপূৰ্ণ ঘোষণা । এক্সৰ মুৰব্বী মাস্কে কয় যে ২,৫০০ ভেৰিফাইড চাবস্ক্ৰাইবাৰ ফল'ৱাৰ্ছ থকা ব্যৱহাৰকাৰীয়ে বিনামূলীয়াকৈ লাভ কৰিব প্ৰিমিয়ামৰ সুবিধা । আনহাতে ৫,০০০ৰো অধিক ভেৰিফাইড চাবস্ক্ৰাইবাৰ ফল'ৱাৰ্ছ থকাসকলে বিনামূলীয়াকৈ প্ৰিমিয়াম প্লাছৰ সুবিধা লাভ কৰিব ।
এলন মাস্কৰ ঘোষণাটোক লৈ আনন্দিত এক্সৰ ব্যৱহাৰকাৰীসকল । একাংশ ব্যৱহাৰকাৰীয়ে ইয়াক আদৰণি জনাই আৰু ইয়াৰ স্পষ্টীকৰণ বিচাৰে । তেওঁ ভেৰিফাইড চাবস্ক্ৰাইবাৰৰ কথা কৈছে নে এক্স চাবস্ক্ৰিপশ্বনৰ পৰিপ্ৰেক্ষিতত গ্ৰাহকসকলৰ বিষয়ে আলোচনা কৰিছে তাৰ স্পষ্টীকৰণো বিচাৰিলে ব্যৱহাৰকাৰীয়ে । এগৰাকী ফল'ৱাৰ্ছৰ মতে যদি এইটো দ্বিতীয় বিকল্প হয়, তেনেহ'লে তেওঁক কেৱল ৪,৭৯৬ জন চাবস্ক্ৰাইবাৰৰ প্ৰয়োজন ।
প্ৰিমিয়াম চাবস্ক্ৰিপশ্বনৰ জৰিয়তে এক্সৰ ব্যৱহাৰকাৰীয়ে বিজ্ঞাপন-মুক্ত অভিজ্ঞতা উপভোগ কৰিবলৈ সক্ষম । একেদৰে অন্যান্য সুবিধাবোৰৰ ভিতৰত পোষ্ট সম্পাদনা কৰিবলৈও অনুমতি দিয়ে । প্ৰিমিয়াম ব্যৱহাৰকাৰীসকলে প্ৰায় ৩ ঘণ্টা দীঘলীয়া ভিডিঅ' আপলোড কৰিব পাৰে আৰু ৮ জিবিলৈকে ফাইল আপলোড কৰিব পাৰে । কেৱল এয়াই নহয় প্ৰিমিয়াম ব্যৱহাৰকাৰীয়ে কমিউনিটি ক্ৰিয়েট কৰিব পাৰে ।