নিউজ ডেস্ক, 1 ছেপ্টেম্বৰ:যোৱা বছৰ দেশত আৰম্ভ হোৱা ভাৰত নিউ কাৰ এচেছমেণ্ট প্ৰগ্ৰেম (ভাৰত এনচিএপি)য়ে এতিয়ালৈকে দেশত বিক্ৰী হোৱা কেইখনমান গাড়ী পৰীক্ষা কৰি সুৰক্ষা সম্বন্ধীয় ৰেটিং প্ৰদান কৰিছে । এতিয়া ভাৰত NCAP য়ে গাড়ীৰ বাবে ছেফটি ৰেটেড QR ক’ড ষ্টীকাৰ মুকলি কৰাৰ কথা ঘোষণা কৰিছে । এই পদক্ষেপৰ লক্ষ্য হৈছে যান-বাহনৰ সুৰক্ষাৰ বিষয়ে মানুহৰ মাজত সজাগতা বৃদ্ধি কৰা । গ্ৰাহকে ষ্টীকাৰত থকা QR ক’ড স্কেন কৰি বাহনখনৰ সুৰক্ষা বৈশিষ্ট্যৰ বিষয়ে জানিব পাৰিব ।
ভাৰত এনচিএপি QR Code কি ?: ভাৰত NCAP য়ে সুৰক্ষা কাৰ্যসূচীৰ অধীনত যিসকল অটোমোবাইল নিৰ্মাতা বাহনৰ ক্ৰেচ টেষ্ট কৰা হৈছে তেওঁলোকক QR কোড ষ্টিক প্ৰদান কৰিব । এই ষ্টীকাৰসমূহত প্ৰাপ্তবয়স্ক আৰু শিশু উভয়ৰে বাবে প্ৰস্তুতকাৰকৰ নাম, বাহন বা মডেলৰ নাম, পৰীক্ষাৰ তাৰিখ আৰু সুৰক্ষাৰ তাৰকা ৰেটিং থাকিব ।
ষ্টীকাৰ স্কেন কৰিলে বাহনখনৰ সবিশেষ তথ্য গ্ৰাহকৰ আগত প্ৰকাশ পাব । জনাওঁ যে বৰ্তমান ক্ৰেচ টেষ্ট সম্পূৰ্ণ কৰা বাহনসমূহৰ ভিতৰত টাটা মটৰ্ছৰ টাটা ছাফাৰী, হেৰিয়াৰ, নেক্সন ইভি আৰু পাঞ্চ ইভি মডেল আছে । এই মডেলসমূহক ভাৰত এনচিএপিয়ে প্ৰাপ্তবয়স্ক আৰু শিশু উভয়ৰে সুৰক্ষাৰ বাবে পঞ্চতাৰকা ৰেটিং দিছে ।
ভাৰত NCAP কি: যোৱা বছৰ গ্ল’বেল এনচিএপিৰ সহযোগত পথ পৰিবহণ আৰু ঘাইপথ মন্ত্ৰণালয়ে ভাৰত NCAP সুৰক্ষা ৰেটিং আৰম্ভ কৰিছিল । এই ক্ৰেচ-টেষ্টিং নীতিৰ জৰিয়তে ভাৰত বিশ্বৰ ভিতৰতে এনে সুৰক্ষা ব্যৱস্থা গ্ৰহণ কৰা পঞ্চমখন দেশ হিচাপে পৰিগণিত হয় । ভাৰত NCAP ঘোষণাৰ সময়ত কেন্দ্ৰীয় পথ পৰিবহণ মন্ত্ৰীয়ে উল্লেখ কৰে যে এই স্বেচ্ছামূলক সুৰক্ষা আঁচনিৰ অধীনত ইতিমধ্যে তেওঁলোকে 30 টাতকৈও অধিক দুৰ্ঘটনা পৰীক্ষাৰ বাবে অনুৰোধ লাভ কৰিছে ।