ডিব্ৰুগড়, 30 এপ্ৰিল: ডিব্ৰুগড় জিলাৰ মোকালবাৰী চাহ বাগিচাত ডায়েৰীয়াই লৈছে ভয়ংকৰ ৰূপ । চাহ বাগিচাখনত প্ৰাদুৰ্ভাৱ ঘটা ডায়েৰীয়াৰ বিভীষিকাই এক আতংকময় পৰিৱশৰ সৃষ্টি কৰিছে । ইতিমধ্যে মোকালবাৰী চাহ বাগিচাত ডায়েৰীয়াত আক্ৰান্ত হৈ দুগৰাকী লোকৰ মৃত্যু হোৱা বুলি জানিব পৰা গৈছে ।
ডায়েৰীয়াত আক্ৰান্ত হৈ মৃত্যু হোৱা লোককেইজন হ’ল ৰাহুল বাউৰী (২৩) আৰু মাখনী বাউৰী (২৫) ৷ জানিব পৰা মতে বাগিচাখনৰ বাসিন্দা মৃত ৰাহুল বাউৰী ৰে’ল বিভাগত শ্ৰমিক হিচাপে কাম কৰিছিল ৷ লোকজন যোৱা মঙলবাৰে ঘৰলৈ অহাৰ পিচতেই বুধবাৰে প্ৰথম ডায়েৰীয়াত আক্ৰান্ত হৈছিল । ইয়াৰ পিচতে ৰাহুল বাউৰীক অসম চিকিৎসা মহাবিদ্যালয় হাস্পতালত ভৰ্তি কৰোৱা হৈছিল যদিও এটা দিনৰ পিচতেই তেওঁৰ মৃত্যু হয় ।
ৰাহুল বাউৰীৰ পিচতে চাহ বাগিচাখনত এজনৰ পিচত আন এজন এই ৰোগত আক্ৰান্ত হৈছে । ডায়েৰীয়াত আক্ৰান্ত হৈ ৰাহুল বাউৰীৰ দেউতাকৰো অৱস্থা সংকটজনক বুলি জানিব পৰা গৈছে ।