তেজপুৰ :ৰাজ্যৰ বিভিন্ন মঠ-মন্দিৰ, দেৱালয়ত শিৱৰাত্ৰিৰ ব্যাপক আয়োজন কৰা হৈছে । শোণিতপুৰ জিলাৰ ঐতিহাসিক মহাভৈৰৱ মন্দিৰতো পুৱাৰে পৰা ভক্তৰ ভিৰ দেখা গৈছে । মহা শিৱৰাত্রিৰ লগ্ন বুধবাৰে পুৱা ৯:৪১:২৫ বজাত আৰম্ভ গৈ বৃহস্পতিবাৰে পুৱা ৮:২৯:৫০ পৰ্যন্ত থাকিব । মহাভৈৰৱ মন্দিৰত দুদিনীয়া কাৰ্যসূচীৰে মহা শিৱৰাত্ৰিৰ আয়োজন কৰা হৈছে । শিৱৰাত্ৰি উপলক্ষে মহাভৈৰৱ মন্দিৰৰ দুৱাৰ বুধবাৰে পুৱা ৪ বজাৰ পৰা সন্ধিয়া ৮ বজালৈ আৰু বৃহস্পতিবাৰে পুৱা ৪:৩০ বজাৰ পৰা নিশা ৮ বজালৈ খোলা থাকিব বুলি মন্দিৰ কৰ্তৃপক্ষই জনাইছে ।
মহা শিৱৰাত্ৰি উপলক্ষে মহাভৈৰৱ মন্দিৰত বুধবাৰে নিশা ৯ বজাৰ পৰা শেষ নিশা ৪:৪০ বজা পৰ্যন্ত মহা শিৱৰাত্ৰিৰ পূজা অনুষ্ঠিত হ'ব আৰু উক্ত পূজাত মহাভৈৰৱ মন্দিৰ পৰিচালনা সমিতিৰ সভাপতি তথা শোণিতপুৰৰ জিলাৰ আয়ুক্ত অংকুৰ ভৰালী উপস্থিত থাকি পূজাৰ কৰ্ম কৰিব । আনহাতে শোণিতপুৰ জিলাৰ ঐতিহ্যমণ্ডিত শৈৱপীঠ শিঙৰীৰ গুপ্তেশ্বৰ দেৱালয়, কেতেকীবাৰীৰ কেতেকেশ্বৰ দেৱালয়, হেঙ্গুলেশ্বৰ দেৱালয়, সিদ্ধেশ্বৰ দেৱালয়, পগলা বাবাৰ থান, ভৈৰবপদ মন্দিৰ, শ্ৰীশ্ৰীহলেশ্বৰ দেৱালয়, নাহৰবাৰীৰ শ্ৰীশ্ৰীনাগেশ্বৰ দেৱালয়, শ্ৰীশ্ৰীনাগঙ্কৰ দেৱালয়, বৰভগীয়া শ্ৰীশ্ৰীবাসুদেৱ মন্দিৰৰ শৈৱপীঠৰ লগতে সকলো শৈৱপীঠতে বুধবাৰৰ পৰা মহা শিৱৰাত্ৰিৰ আয়োজন কৰা হৈছে ।
ঐতিহাসিক মহাভৈৰৱ মন্দিৰত মহাশিৱৰাত্ৰি (ETV Bharat) উল্লেখ্য যে মহাভৈৰৱ এছিয়াৰ বৃহৎ শিৱলিংগ থকা প্ৰসিদ্ধ শিৱ মন্দিৰবোৰৰ ভিতৰত অন্যতম । প্ৰাচীন কালত শোণিতপুৰৰ বাণ ৰজাই এই মন্দিৰত পূজা অৰ্চনা কৰিছিল । কথিত আছে যে বাণ ৰজাৰ জীয়ৰী ঊষাইও ইয়াতেই নিতৌ পূজা অৰ্চনা কৰিছিল । মূল মন্দিৰৰ ভিতৰত এটা বৃহৎ শিৱ লিংগ আছে । এই লিংগটোৰ উচ্চতা প্ৰায় ৩.২ মিটাৰ আৰু প্ৰস্থ প্ৰায় ২.৩ মিটাৰ আৰু ই সদায় আকাৰত ডাঙৰ হৈ থাকে বুলি বিশ্বাস কৰা হয় ।
মহা শিৱৰাত্রি কিয় পালন কৰা হয় ?
মহা শিৱৰাত্ৰিত বিশ্বজুৰি হিন্দুসকলৰ আৰাধ্য দেৱতা শিৱ বা মহাদেৱক পূজা কৰা হয় । ই ভগৱান শিৱ আৰু দেৱী পাৰ্বতীৰ আকাশী মিলনক বুজায়, য'ত সৃষ্টি, সংৰক্ষণ আৰু ধ্বংসৰ মহাজাগতিক নৃত্যৰ চিত্ৰণ কৰা হৈছে । মহা শিৱৰাত্ৰি 'শিৱৰ মহাৰাতি' ভাৰতৰ আধ্যাত্মিক পঞ্জিকাৰ আটাইতকৈ উল্লেখযোগ্য অনুষ্ঠান । প্ৰতিটো চন্দ্ৰ মাহৰ চতুৰ্দশ দিন বা অমাৱস্যাৰ আগদিনা শিৱৰাত্ৰি নামেৰে জনা যায় । এটা কেলেণ্ডাৰ বৰ্ষত হোৱা ১২ টা শিৱৰাত্ৰিৰ ভিতৰত ফেব্ৰুৱাৰী-মাৰ্চ মাহত হোৱা শিৱৰাত্ৰিৰ আটাইতকৈ আধ্যাত্মিক তাৎপৰ্য আছে । এই নিশাই গ্ৰহটোৰ উত্তৰ গোলাৰ্ধ এনেদৰে স্থাপন কৰা হয় যে মানুহৰ মাজত শক্তিৰ স্বাভাৱিক উত্থান ঘটে । এই দিনটো যেতিয়া প্ৰকৃতিয়ে মানুহক নিজৰ আধ্যাত্মিক শিখৰৰ দিশে আগুৱাই নিয়ে । এই পৰম্পৰাত আমি এটা নিৰ্দিষ্ট উৎসৱ পালন কৰোঁ, যিটো সমগ্ৰ নিশাই চলি থাকে । এই নিশাৰ উৎসৱৰ এটা মৌলিক দিশ হ'ল আপুনি গোটেই ৰাতিটো আপোনাৰ মেৰুদণ্ড উলম্ব কৰি সজাগ হৈ থকাটো নিশ্চিত কৰা ।
শিৱক আৰু কেতিয়া জলাভিষেক কৰে ?
আনহাতে পৱিত্ৰ শাওণ মাহত ভগৱান শিৱক আৰাধনা কৰাৰ বাবে ভক্তসকলৰ মহাভৈৰৱ মন্দিৰলৈ আগমন হয় । শাওণ মাহ ভগৱানৰ প্রিয় মাহ । মানুহে ইমান কষ্ট কৰি পৱিত্ৰ ধাৰাৰ পৰা জল আনি খালী ভৰিৰে ভগৱান শিৱৰ লিংগত প্ৰদান কৰে আৰু প্ৰাপ্তি লাভ কৰে বুলি জানিব পৰা যায় । শাওণ মাহত ব'ল ব'ম …ব'ল ব'ম কৰি স্থানীয় বিভিন্ন নদীৰ পৰা খোজকাঢ়ি পুৱতি নিশা পানী আনি পুৱা শিৱ লিংগত দিয়ে । শিৱৰ লিংগত জলাভিষেক কৰিলে মানুহৰ মনৰ আশা পূৰ্ণ হয় বুলি বিশ্বাস কৰা হয় । প্ৰবাদ মতে এই সময়ত ভগৱান বিষ্ণু গভীৰ যোগ নিদ্ৰাত থাকে । সেইবাবেই শাওণ মাহত সমগ্ৰ বিশ্ব ব্ৰহ্মাণ্ডৰ দায়িত্ব থাকে শিৱৰ ওপৰত । গতিকে শাওণ মাহত যাতে শিৱ অসন্তুষ্ট নহয় সেই কাৰণে সেই মাহত শিৱক আৰাধনা কৰা হয় ।
শাস্ত্রত উল্লেখ আছে যে যেতিয়া এবাৰ দেৱতা আৰু দানৱসকলৰ বাবে সাগৰ মন্থন কৰা হৈছিল তেতিয়া তাৰ পৰা বিহ নিৰ্গত হৈছিল । সেই বিহ সেৱনৰ পৰা সমগ্ৰ জগতক ৰক্ষা কৰিবৰ কাৰণে শিৱই হলাহলে সেই বিহ পান কৰি নীলকণ্ঠ হৈছিল আৰু সমগ্ৰ পৃথিৱীক ৰক্ষা কৰিছিল । সেইবাবেই শিৱক নীলকণ্ঠ বুলিও জনা যায় । এই বিহ পান কৰাৰ সময়ত সমগ্ৰ দেৱ-দেৱীয়ে শিৱৰ শিৰত আৰু দেহত গাখীৰ আৰু পানী ঢালিছিল যাতে শিৱই পান কৰা বিহ মুক্ত হৈ যায় । জনশ্ৰুতি মতে সেই সাগৰ মন্থনৰ সময়ত এই শাওণ মাহ আছিল আৰু তেতিয়াৰ পৰাই শিৱক জলাভিষেক কৰোৱা হয় । বিভিন্ন নদ-নদীৰ পৰা ভক্তসকলে শিৱৰ বাবে খালী ভৰিৰে পানী আনি শিৱলিংগত প্ৰদান কৰে ফলত ভক্তৰ মনৰ আশা পূৰ্ণ হয় বুলি ধাৰণা কৰা হয় ।
লগতে পঢ়ক :মহাশিৱৰাত্ৰিৰ প্ৰাকক্ষণত জানক উমানন্দ মন্দিৰৰ ইতিহাস - MAHA SHIVRATRI 2025
