আমগুৰি :আজি টাই আহোমসকলৰ পবিত্ৰ মে-ডাম-মে-ফি উৎসৱ ৷ পূৰ্বপুৰুষক স্মৰণ কৰাৰ লগতে দেশ-জাতিৰ মংগলৰ হেতুকে টাই আহোমসকলে আজিৰ এই বিশেষ দিনটোত পূজা কৰে ৷ ৰাজ্যৰ বিভিন্ন প্ৰান্তৰ লগতে আমগুৰিতো অতি আধ্যাত্মিকভাৱেৰে উদযাপন কৰা হৈছে পবিত্ৰ মে-ডাম-মে-ফি ৷
পিছে আপুনি বাৰু জানেনে কিয় মে-ডাম-মে-ফি পালন কৰা হয় ? প্ৰতি বছৰে ৩১ জানুৱাৰী তাৰিখে মে-ডাম-মে-ফি পালন কৰাৰ তাৎপৰ্য কি ?
মে-ডাম-মে-ফিৰ অৰ্থ :
‘মে’ মানে প্ৰাৰ্থনা, উপাসনা বা পূজা কৰা, ‘ডাম’- মানে মৃতক আৰু ‘ফি’- মানে হ’ল দেও বা দেৱতা । টাই আহোমসকলৰ এই ধৰ্মীয় সামাজিক উৎসৱত পূজা-পাতল কৰিলে তেওঁলোকৰ উপৰিপুৰুষ সন্তুষ্ট হয় বুলি জনবিশ্বাস আছে ৷ লগতে উপৰিপুৰুষে পূজাত সন্তুষ্ট হৈ স্বৰ্গৰ পৰাই তেওঁলোকক আৰ্শীবাদ প্ৰদান কৰে বুলি লোকবিশ্বাস আছে ।
টাই এই পৰম্পৰাৰ জৰিয়তে উপৰি-পুৰুষৰ সৈতে অশাৰীৰিক যোগসূত্ৰ স্থাপন কৰি নিজৰ আৰু সমাজৰ তথা দেশৰ মংগলৰ বাবে জন-মিং বা আশীৰ্বাদ বিচৰা হয় । অন্যান্য পৰম্পৰাৰ দৰে মে-ডাম-মে-ফি পালনৰ বাবেও নীতি-নিয়ম আছে ৷ যাক টাই আহোম ভাষাত "খয়েক লাই" বুলি জনা যায় ৷
