Published : Jul 5, 2024, 10:08 PM IST
গোলাঘাট,৫ জুলাই: দেৰগাঁৱৰ লাচিত বৰফুকন পুলিচ একাডেমীৰ কনভেনচন হলত অনুষ্ঠিত হয় GST সম্পৰ্কীয় এক বিশেষ মত বিনিময় অনুষ্ঠান । উক্ত অনুষ্ঠানত অংশগ্ৰহণ কৰে যোৰহাট, গোলাঘাট, শিৱসাগৰ আৰু মাজুলীৰ বাণিজ্য তথা ব্যৱসায়িক সংস্থাৰ প্ৰতিনিধিসকলে । চৰকাৰৰ তৰফৰ অংশগ্ৰহণ কৰে পৰা বিত্তমন্ত্ৰী অজন্তা নেওগ, গৃহনিৰ্মাণ আৰু নগৰ পৰিক্ৰমা, জলসিঞ্চন বিভাগৰ মন্ত্ৰী অশোক সিংহল আৰু কৰ অধীক্ষক পল্লৱ কুমাৰ ঝায়ে ।
মূলতঃ ব্যৱসায়ীসকলে GST কেন্দ্ৰিক যিসমূহ সমস্যাৰ সন্মুখীন হৈছে বা নতুনকৈ কি ধৰণেৰে GST প্ৰদান কৰাৰ ক্ষেত্ৰত সমস্যামুক্ত হ'ব পাৰে সেই সন্দৰ্ভত মত বিনিময় কৰা হয় । ব্যৱসায়ীসকলে দীৰ্ঘদিন ধৰি সমস্যাৰ সন্মুখীন হৈ অহা আৰু জি এছ টিৰ নামত মধ্যবিত্ত ব্যৱসায়িক প্ৰতিষ্ঠানসমূহে ভুগি অহা অবান্তৰ সমস্যাৰ বিষয়ে আসোঁৱাহসমূহৰ সবিশেষ তথ্য গ্ৰহণ কৰে চৰকাৰৰ প্ৰতিনিধিসকলে । অসমৰ ৬ টা জ'নৰ ভিতৰত শুকুৰবাৰে ৬ নম্বৰ অৰ্থাৎ শেষৰ অনুষ্ঠানটোৰ পৰা কৰদাতা বা ব্যৱসায়ীসকলৰ পৰা পোৱা GST সম্পৰ্কীয় পৰামৰ্শসমূহক অসম কেবিনেটত আলোচনা কৰি প্ৰতিবেদন প্ৰকাশ কৰাৰ কথা প্ৰকাশ কৰে মন্ত্ৰী অশোক সিংহলে ৷
আনহাতে ব্যৱসায়ীসকলৰ পৰামৰ্শ অনুযায়ী কৰদাতা বা ব্যৱসায়ীসকলৰ মাজত প্ৰথম বাৰ বছৰেকত দুখন এনেধৰণৰ আলোচনা সভা অনুষ্ঠিত কৰাৰ কথা প্ৰকাশ কৰে অজন্তা নেওগে ৷ যাতে কোনোধৰণৰ অসুবিধাৰ সন্মুখীন নহয় ব্যৱসায়ীসকল ৷ ইফালে মন্ত্ৰী অশোক সিংহলে গুৱাহাটী জ্যোতিনগৰত সংঘটিত হোৱা ঘটনাক হৃদয়বিদাৰক ঘটনা বুলি দুখ প্ৰকাশ কৰে ৷ মন্ত্ৰী অজন্তা নেওগে বন্যাৰ্তৰ সাহায্যৰ ক্ষেত্ৰত চৰকাৰে সকলো ধৰণৰ ব্যৱস্থা কৰিব আৰু পোন্ধৰ আগষ্টৰ ভিতৰতে বানত ক্ষতিগ্ৰস্ত ৰাইজক ক্ষতিপুৰণ দিয়াৰ কথা প্ৰকাশ কৰে ৷
