নগাঁও, 14 ফেব্ৰুৱাৰী: কাজি নেমুক ৰাজ্যিক ফল ঘোষণা কৰিলে অসম চৰকাৰে । চৰকাৰৰ এই ঘোষণাই উৎসাহ যোগাব বুলি দাবী কৰিছে নগাঁও-মৰিগাঁও জিলাৰ সীমান্তৰ এগৰাকী কৃষকে । ৰাজ্যিক ফল ঘোষণা কৰা চৰকাৰে নেমু খেতিৰ সৈতে জড়িত খেতিয়কক চৰকাৰী সুবিধা প্ৰদানৰো দাবী জনাইছে কাজি নেমু খেতিৰে স্বাৱলম্বী হোৱা উচ্চ শিক্ষিত কৃষক ধনমণি শইকীয়াই ।
উল্লেখ্য যে কাজি নেমুক ৰাজ্যিক ফল ঘোষণা কৰিছে ৰাজ্যৰ কৃষিমন্ত্ৰী অতুল বৰাই । মঙলবাৰে সদনৰ মজিয়াত কাজি নেমুক ৰাজ্যিক ফল হিচাপে ঘোষণা কৰাৰ পিচতেই উৎফুল্লিত হৈ পৰিছে নেমু খেতিৰ সৈতে জড়িত কৃষক । ৰাজ্যৰ কৃষিমন্ত্ৰীৰ ঘোষণাৰ পিচত উৎফুল্লিত এগৰাকী নেমু খেতিয়কে প্ৰকাশ কৰিলে আক্ষেপো ।
নগাঁও-মৰিগাঁও জিলাৰ সীমান্তৰ জাজৰি মোলান কামোৰা গাঁৱৰ এগৰাকী উচ্চ শিক্ষিত লোক স্বাৱলম্বী হৈছে নেমু খেতিৰ জৰিয়তে । লোকজনৰ নাম ধনমণি শইকীয়া । মোলান কামোৰা গাঁৱৰ ধনমণি শইকীয়া ১৯৯৩ চনতে নগাঁও মহাবিদ্যালয়ৰ পৰা স্নাতক ডিগ্ৰী লাভ কৰাৰ পিছত ১৯৯৪ চনৰ পৰাই জড়িত হৈ পৰিছে নেমু খেতিৰ সৈতে ।