গুৱাহাটী, ১৮ জুলাই :কংগ্ৰেছক বিৰোধী দলসমূহৰ সমৰ্থন লাগে কিন্তু আসন এৰি নিদিয়ে । এই কথা পাকে-প্ৰকাৰে বুজাব বিচাৰিছে প্ৰদেশ কংগ্ৰেছৰ সভাপতি ভূপেন কুমাৰ বৰাই । ৫ টা সমষ্টিৰ উপ নিৰ্বাচনত কংগ্ৰেছ দলে অকলে নিৰ্বাচন খেলাৰ ইংগিত দিয়াৰ পিচতে বিৰোধী ঐক্য মঞ্চত ক্ষোভৰ উদগীৰণ হৈছে । বিৰোধী ঐক্য মঞ্চত থকা দলসমূহে ব্যাপক প্ৰতিক্ৰিয়া প্ৰকাশ কৰিছে । কিন্তু তাৰ পাচতো ভূপেন কুমাৰ বৰাই ক'ব বিচাৰে যে এলায়েন্সৰ ধৰ্ম কংগ্ৰেছতকৈ কোনেও বেছিকৈ নাজানে ।
এলায়েন্সৰ ধৰ্ম কংগ্ৰেছতকৈ কোনেও বেছিকৈ নাজানে (ETV Bharat Assam) বৃহস্পতিবাৰে সংবাদ মাধ্যমৰ সন্মুখত ভূপেন কুমাৰ বৰাই 'ইণ্ডি' এলায়েন্সৰ প্ৰেক্ষাপটত বিভিন্ন ৰাজ্যৰ নিৰ্বাচনী প্ৰসংগৰে কয় যে এলায়েন্সত থাকিলেই সকলো দলে নিৰ্বাচনত অৱতীৰ্ণ নহয় । বৰাই নিৰ্বাচনী ইতিহাসৰ কথা কৈ বিৰোধীৰ সমৰ্থনত অকলে নিৰ্বাচন খেলাৰ কথাটোকে পৰোক্ষভাৱে দাঙি ধৰে ।
বৰাই কয় যে বিৰোধী ঐক্য মঞ্চত থকা দলসমূহক লৈয়ে ২০২৬ ৰ নিৰ্বাচন খেলাটো নিশ্চিত । কিন্তু আজিৰ তাৰিখত কোনেও ঘৰত হাত-সাৱটি বহি থাকিলে নহ'ব । দলসমূহে নিজৰ শক্তি বৃদ্ধিৰ বাবে কাম কৰিব লাগিব । কাম নকৰি কেৱল বিধানসভাত পাঁচটা টিকট দিয়ক বুলি ক'লে নহ'ব । দলসমূহে নিজৰ পৰিসৰ বৃদ্ধি তথা সাংগঠনিক ভেটি শক্তিশালী কৰাৰ বাবে কাম কৰিব লাগিব বুলি প্ৰদেশ কংগ্ৰেছৰ সভাপতিগৰাকীয়ে উল্লেখ কৰে ।
উপ-নিৰ্বাচনৰ প্ৰসংগত বৰাই কয় যে ইণ্ডিয়া ব্লকত ২৬ টা দল আছে । মহাৰাষ্ট্ৰৰ নিৰ্বাচনত ২৬ টা দলে টিকট নাপায় । তাত শিৱসেনা, এন চি পি আৰু কংগ্ৰেছে টিকট পাব । কথাটো সকলোৱে বুজি পাব লাগিব বুলি তেওঁ উল্লেখ কৰে । বিৰোধী ঐক্য মঞ্চ এনেকুৱা নহয় যে প্ৰত্যেকটো দলৰে বিহালীত সংগঠন আছে । তাত চি পি আই এম এলৰ সংগঠন আছে । যাৰ বাবে চি পি আই এম এলৰ সৈতে কথা পতা হৈছে বুলি তেওঁ উল্লেখ কৰে ।
বঙাইগাঁৱত বৰপেটা লোকসভা নিৰ্বাচনৰ ভোট চালেই গম পোৱা যায় যে তাত বিৰোধী ঐক্য মঞ্চৰ কাৰ প্ৰভুত্ব আছে । চিদলীত ক্ৰমে বি পি এফ, ইউ পি পি এল আৰু কংগ্ৰেছৰ প্ৰভাৱ আছে । চতুৰ্থ স্থানত তাত কোনো নাই বুলি ভূপেন কুমাৰ বৰাই দাবী কৰে । প্ৰসংগ ক্ৰমে বৰাই কয় যে হিমাচল প্ৰদেশৰ ৪ খন আসনৰ উপ-নিৰ্বাচনত কংগ্ৰেছে খেলিছে । তাত ৪ টা দলে ৪ খন আসন ভাগ কৰি লোৱা নাই ।
ইতিহাসৰ কথা সদৰী কৰি বৰাই কয় যে এলায়েন্সৰ ধৰ্ম কংগ্ৰেছত কৈ কোনেও বেছিকৈ নাজানে । এলায়েন্সৰ ধৰ্ম কোনেও কংগ্ৰেছক শিকাব নালাগে । কংগ্ৰেছে এলায়েন্সৰ ধৰ্ম পালন কৰিব বুলি সদৰী কৰি বৰাই কয় যে এনেকুৱা প্ৰৱণতা হ'ব নালাগে যে টিভিত ওলাবৰ বাবে তেওঁক গালি পাৰিব লাগে । ভূপেন কুমাৰ বৰা আৰু কংগ্ৰেছক গালি পাৰিলে টিভিত ওলাব পাৰিব বুলি ভাবি ল'ব নালাগে বুলি তেওঁ উল্লেখ কৰে ।
আনহাতে মুখ্যমন্ত্রীৰ প্ৰসংগত বৰাই কয় যে এইজনেই গুজৰাটৰ পানীৰ পাইপেৰে মুছলমানৰ তেজ বৈ যায় বুলি কৈছিল । মুখ্যমন্ত্রীয়ে চিন্তিত হৈ হিন্দু-মুছলামনৰ কথা কোৱা নাই । মুখ্যমন্ত্রীয়ে বান-খহনীয়াৰ সমস্যা সমাধান কৰাত ব্যৰ্থ হোৱা বাবেই হিন্দু-মুছলমানৰ প্ৰসংগ কৈছে বুলি ভূপেন কুমাৰ বৰাই অভিযোগ কৰে । তেওঁৰ মতে মুখ্যমন্ত্ৰীগৰাকী নিবনুৱা সমস্যা সমাধান কৰাত ব্যৰ্থ । বিভিন্ন ক্ষেত্রত ব্যৰ্থ । ৮ জন মানুহ আনিবৰ বাবে বিজেপিয়ে ৫ জনক গুলীয়াই মাৰিলে বুলিও কংগ্ৰেছৰ সভাপতিগৰাকীয়ে অভিযোগ কৰে । আনহাতে এই কথাবোৰ তল পেলাবৰ বাবে মুখ্যমন্ত্রীয়ে হিন্দু-মুছলমানৰ কথা কৈ আছে আৰু মুখ্যমন্ত্রীয়ে এতিয়া নিজৰ দুৰ্নীতি ঢাকিব নোৱৰা হৈছে বুলিও বৰাই দাবী কৰে ।
