ডিব্ৰুগড়: সমাগত গণৰাজ্য দিৱস । গণৰাজ্য দিৱস শান্তিপূর্ণভাৱে অনুষ্ঠিত কৰিবলৈ আৰক্ষী, প্ৰশাসন চলাইছে ব্যাপক প্ৰস্তুতি । ইয়াৰ মাজতে ঐতিহাসিক চৰাইদেউৰ সোণাৰিত জিলা আদালতৰ চৌহদত সংঘটিত হয় এক ৰহস্যজনক বিস্ফোৰণ । এই ঘটনাত আহত হয় এজন আদালতৰ কৰ্মচাৰী । মঙলবাৰে বিয়লি চৰাইদেউৰ ন্যায়িক আদালতৰ চৌহদত হোৱা এটা প্ৰচণ্ড শব্দই সমগ্ৰ অঞ্চলটোৰ ৰাইজক আতংকিত কৰি তোলে ।
জানিব পৰা অনুসৰি আদালতৰ কিছুমান অপ্ৰয়োজনীয় কাগজ-পত্ৰ আৰু অন্যান্য বস্তু আদালতত নিয়োজিত বিষয়াই জ্বলাই থকা অৱস্থাত প্ৰচণ্ড শব্দই গোটেই অঞ্চলটো কঁপাই তোলে । প্ৰথম সৰু সৰুকৈ দুবাৰ শব্দ হোৱা পাছতে ৰহস্যজনকভাৱে প্ৰচণ্ড শব্দই কঁপাই গ'ল সোণাৰি । কি শব্দই গোটেই অঞ্চলটো কঁপাই তুলিলে সেই কথা পোহৰলৈ অহা নাই ।
উক্ত শব্দ হোৱা স্থানত বহু সংখ্যক ঠাইৰ ঘাঁহ-বন জ্বলি ছাঁই হৈ যায় । জুই জ্বলোৱা ঠাইত কোনো বিস্ফোৰক সামগ্ৰী থকা বুলি সন্দেহ কৰিছে । ঘটনাটোত নিচান দাস নামৰ উকীল সংস্থাত কৰ্মৰত এজন অস্থায়ী কৰ্মচাৰী আহত হৈছে । আহত ব্যক্তিজনক ইতিমধ্যে চিকিৎসালয়লৈ প্ৰেৰণ কৰা হৈছে । ঘটনাৰ পাছতে অগ্নিনিৰ্বাপক বাহিনী ঘটনাস্থলীত উপস্থিত হৈ অগ্নি নিৰ্বাপন কৰে ।
ইয়াৰ পিছতে সোণাৰি আৰক্ষীৰ এটা দল ঘটনাস্থলীত উপস্থিত হৈ বিস্ফোৰণৰ প্ৰকৃত কাৰণ উদ্ধাৰৰ বাবে অনুসন্ধান আৰম্ভ কৰিছে । কিন্তু আদালতৰ চৌহদত হোৱা এই বিস্ফোৰণৰ ঘটনাই চিন্তিত কৰিছে ৰাইজক ।