মৰাণ, ৭ ছেপ্টেম্বৰ: জনজাতিকৰণৰ প্ৰসংগক লৈ এইবাৰ কংগ্ৰেছ-বিজেপিৰ বাকযুদ্ধ । জনজাতিকৰণৰ দাবীত বিভিন্ন দল-সংগঠনে ধাৰাবাহিক প্ৰতিবাদ সাব্যস্ত কৰাৰ পিছতো কোনো এখন চৰকাৰে এই বিযয়টোত গুৰুত্ব প্ৰদান কৰা নাই ৷ ইয়াকে লৈ চলিছে মুখ্যমন্ত্ৰী ড৹হিমন্ত বিশ্ব শৰ্মা আৰু সাংসদ গৌৰৱ গগৈৰ বাকযুদ্ধ । কংগ্ৰেছৰ ভুলৰ বাবে জনজাতিকৰণ হোৱা নাই বুলি মুখ্যমন্ত্ৰীগৰাকীয়ে মন্তব্য় কৰাৰ পিছতেই এই সন্দৰ্ভত প্ৰতিক্ৰিয়া প্ৰকাশ কৰিছে সাংসদ গৌৰৱ গগৈয়ে ।
শনিবাৰে ডিব্ৰুগড়ৰ এক অনুষ্ঠানত অংশগ্ৰহণ কৰি মুখ্যমন্ত্ৰীক উভতি ধৰি সাংসদ গৌৰৱ গগৈয়ে কয়," অসমৰ ৰাইজক অপমানিত কৰিব নালাগে মুখ্যমন্ত্রীয়ে, অসমৰ ৰাইজে সকলো কথা জানে । অপপ্ৰচাৰ কৰা ৰাজনীতি বন্ধ কৰক । যদি সঁচাই জনজাতিকৰণ বিচাৰে তেতিয়াহ'লে চৰকাৰে এই ডেৰ বছৰ আছে, এই সময়ত কৰি দেখুৱাওক । বাস্তৱত চৰকাৰৰ কৰিবলৈ ইচ্ছা নাই, সেয়ে তেওঁলোকে দায়িত্ব লোৱাতকৈ নিজৰ ব্যৰ্থতাৰ দোষ কংগ্ৰেছক দিব বিচাৰিছে ।"
সাংসদগৰাকীয়ে পুনৰ কয়," ছমাহৰ ভিতৰত জনজাতি কৰিম বুলি প্ৰধানমন্ত্ৰীয়ে কৈছিল । কিন্তু প্ৰধানমন্ত্ৰী নৰেন্দ্ৰ মোদী ইমান দুৰ্বল নে দহ বছৰ আগতে কংগ্ৰেছ দলে লোৱা সিদ্ধান্ত এটাৰ বাবে জনজাতিকৰণ দিব পৰা নাই । সেয়ে অসমৰ ৰাইজে এই বিলাক কথা জানে । মুখ্যমন্ত্রীৰ এই বিলাক কথা বিশ্বাস নকৰে । নিজৰ চকী বচাবলৈ মুখ্যমন্ত্রীয়ে যিকোনো পৰ্যায়লৈ যাব পাৰে । ডেৰ বছৰ আছে, অপপ্ৰচাৰ আৰু মিছা ৰাজনীতি কৰা বাদ দিয়ক ।"