গুৱাহাটী,১৯ মে' :সুৰামুক্ত সমাজ গঢ়াৰ বাবে সচেতন ৰাইজে বিভিন্ন সময়ত চৰকাৰক আহ্বান জনাই আহিলেও চৰকাৰে ৰাজহ সংগ্ৰহ বৃদ্ধিৰ বাবে এই বিষয়কলৈ গুৰুত্ব প্ৰদান কৰা নাই । শেহতীয়াভাৱে ৰাজ্য় চৰকাৰে চহৰে-নগৰে, গাঁৱে-ভূঞে সুৰাৰ দোকানৰ সংখ্যা বৃদ্ধি কৰি, সুৰাৰ দাম বঢ়াই ৰাজহ বৃদ্ধিৰ চেষ্টা চলোৱাতেই ক্ষান্ত নাথাকি সুৰা বিপনীক ইয়াৰ বিক্ৰী বৃদ্ধি কৰিবলৈ নিৰ্দেশ দিয়াৰ পিচতেই ৰাজ্য়জুৰি সৃষ্টি হৈছে প্ৰতিক্ৰিয়া । এইবাৰ চৰকাৰৰ এই সুৰা বৃদ্ধিৰ কৌশলৰ বিৰোধিতা কৰিলে এআইইউডিএফৰ মুৰব্বী তথা ধুবুৰী লোকসভা সমষ্টিৰ সাংসদ বদৰুদ্দিন আজমলে । ৰাজহৰ বাবে সুৰাৰ বিক্ৰী বৃদ্ধি কৰাৰ বিপৰীতে বিকল্প ব্যৱস্থা কৰাৰ বাবে চৰকাৰৰ প্ৰতি দাবী জনাই ধুবুৰী সমষ্টিৰ সাংসদ বদৰুদ্দিন আজমলে কয়," সুৰাৰ প্ৰচলন বৃদ্ধি হ'লে গৃহ হিংসা বৃদ্ধি পাব। "
সুৰাই নৱপ্ৰজন্মক ধ্বংস কৰিব বুলি উল্লেখ কৰি সাংসদ বদৰুদ্দিন আজমলে চৰকাৰক ৰাজ্যৰ গ্ৰামাঞ্চলত সুৰা বিপনীৰ অনুজ্ঞাপত্ৰ নিদিবলৈ আহ্বান জনায় । তেওঁ কয়, "মন্দিৰ, মছজিদ, বিদ্যালয় আদি থকা অঞ্চলত সুৰা বিপনীৰ অনুজ্ঞাপত্ৰ দিলে সমাজৰ ক্ষতি হোৱাৰ লগতে বহু পৰিয়ালৰ তথা যুৱপ্ৰজন্মৰ ক্ষতিসাধন হ'ব । "