মৰিগাঁও,৭ জুলাই:ৰাজ্যৰ বান পৰিস্থিতিৰ বুজ ল'বলৈ জিলা জিলাই ভ্ৰমণ কৰিছে অসম চৰকাৰৰ মন্ত্ৰীসকলে । সমান্তৰালকৈ শনিবাৰে মায়ঙৰ বান আৰু গৰাখনীয়া বিধ্বস্ত অঞ্চলত পৰিদৰ্শন কৰে মন্ত্ৰী পীযুষ হাজৰীকাই । শনিবাৰে মৰিগাঁও জিলাৰ মায়ং ৰাজহ চক্ৰৰ মায়ং, চনকা আৰু এক নং মূৰকাটাত বান আৰু গৰাখনীয়া বুজ ল’বলৈ উপস্থিত হয় অসম চৰকাৰৰ জলসম্পদ বিভাগৰ মন্ত্ৰী পীযুষ হাজৰীকা ৷ বান বিধ্বস্ত চনকা অঞ্চল পৰিদৰ্শন কৰাৰ লগতে ক্ষয়ক্ষতিৰ বুজ লয় মন্ত্ৰীগৰাকীয়ে ৷
মৰিগাঁও জিলা আয়ুক্ত দেৱাশীষ শৰ্মা, জল সম্পদ বিভাগৰ কাৰ্লযবাহী অভিযন্তা লোচন চৌধুৰীসহ বিষয়-কৰ্মচাৰীক লগত লৈ বানাক্ৰান্ত আৰু গৰাখহনীয়া অঞ্চলৰ বুজ লয় মন্ত্ৰীগৰাকীয়ে । মায়ং ৰাজহ চক্ৰৰ তথা জাগীৰোড বিধানসভাৰ সমষ্টিৰ বানাক্ৰান্ত লোকসকলৰ বিভিন্ন সমস্যা সন্দৰ্ভত মতবিনিময় কৰে মন্ত্ৰী পীযুষ হাজৰীকাই । মায়ং অঞ্চলৰ বহুকেইটা অঞ্চলত বানপ্ৰীড়িত লোকসকলৰ সৈতেও মত বিনিময় কৰি মন্ত্ৰী পীযুষ হাজৰীকাই জিলা আয়ুক্তৰ দেবাশীষ শৰ্মাক সকলো ধৰণৰ বানসাহায্য উপযুক্তভাৱে আগবঢ়োৱাৰ বাবে নিৰ্দেশ প্ৰদান কৰে ।
ইয়াৰ বিপৰীতে জাগীৰোড সমষ্টিৰ চনকা অঞ্চলত শেহতীয়াকৈ পথ আৰু দলং খহনীয়াৰ কবলত পৰা স্থানসমূহত উপস্থিত হৈ বান শুকুৱাৰ পিচতে সকলো কাম কৰা হ'ব বুলি সদৰী কৰে । বিশেষকৈ জিলাখনৰ মায়ং ৰাজহ চক্ৰৰ ১ নং মূৰকাটাত ব্ৰহ্মপুত্ৰ নদীৰ গঢ়া খহনীয়া পৰ্যবেক্ষণ কৰি অতি শীঘ্ৰেই খহনীয়া ৰোধৰ ব্যৱস্থা কৰা হ’ব বুলিও আশ্বাস প্ৰদান কৰে ।