গুৱাহাটী: আজি পবিত্ৰ বৰদিন । খ্ৰীষ্টান ধৰ্মাৱলম্বী লোকসকলে সমগ্ৰ দেশৰ লগতে ৰাজ্যৰ প্ৰান্তে প্ৰান্তে উদযাপন কৰিছে বৰদিন । ইয়াৰ ব্যতিক্ৰম নহয় গুৱাহাটী মহানগৰী । ৰাজ্যৰ বিভিন্ন প্ৰান্তৰ লগতে গুৱাহাটী মহানগৰীতো বৰদিনক কেন্দ্ৰ কৰি সৃষ্টি হৈছে এক উৎসৱমুখৰ পৰিৱেশৰ । মহানগৰীত থকা গীৰ্জাসমূহত আৰম্ভ হৈছে ভিৰ । এই গীৰ্জাসমূহৰ মাজতেই জিলিকি আছে উত্তৰ-পূৰ্বাঞ্চলৰ অটাইতকৈ পুৰণি গীৰ্জাটো । ক'ত আছে এই পুৰণি গীৰ্জাটো ?
লিখা আছে সোণালী ইতিহাস :
১৭৯ বছৰ পূৰ্বে মহানগৰীৰ নাভিকেন্দ্ৰত স্থাপিত এই ঐতিহাসিক গীৰ্জাটোৰ বুকুতেই লিখা আছে সোণালী ইতিহাস । উত্তৰ-পূৰ্বাঞ্চলৰ অটাইতকৈ পুৰণি গীৰ্জাটোত আজি বৰদিন উপলক্ষে আয়োজন কৰা হৈছে বিভিন্ন অনুষ্ঠানৰ । ১৮৪৪ চনতে গুৱাহাটীৰ পাণবজাৰত স্থাপন কৰা হৈছিল গুৱাহাটী খ্ৰীষ্ট চাৰ্চ (Christ)। বৃটিছৰ শাসন কালতে স্থাপন হোৱা এই গীৰ্জাটোৱে মহানগৰীৰ বিভিন্ন ঘটনা পৰিঘটনাৰ উত্থান পতনৰ সাক্ষী হৈ আছে ।
১৭৯ বছৰ পূৰ্বে গৌহাটী খ্ৰীষ্ট চাৰ্চ নামেৰে পৰিচিত গুৱাহাটী খ্ৰীষ্ট গীৰ্জাই খ্ৰীষ্টান ধৰ্মৰ বীজ অসমত কিদৰে সিঁচিছিল খ্ৰীষ্টান ধৰ্মাৱলম্বী লোকৰ সংখ্য়া বৃদ্ধিয়ে ইয়াৰ প্ৰমাণ দাঙি ধৰে । গুৱাহাটীত বৰ্তমান কেইবাটাও গীৰ্জা আছে যদিও পাণবজাৰৰ নেহৰু পাৰ্কৰ গাতে লাগি থকা গীৰ্জাটো হৈছে কেৱল গুৱাহাটীৰ নহয়, সমগ্ৰ উত্তৰ-পূৰ্বাঞ্চলৰ আটাইতকৈ পুৰণি গীৰ্জা ।
এই সন্দৰ্ভত গীৰ্জাটোৰ মুখ্য তত্বাৱধায়ক হেৰিচন মাচিয়ে কয়, "১৭৯ বছৰ পুৰণি এই গীৰ্জাটো ভয়ংকৰ ভূমিকম্পত দুবাৰকৈ ভাগি গৈছিল । ১৮২৬ চনৰ ইয়াণ্ডাবু সন্ধিৰ পিছত ইষ্ট ইণ্ডিয়া কোম্পানীয়ে আধিপত্য অসমলৈ সম্প্ৰসাৰিত হৈছিল । ব্ৰীটিছ শাসক আছিল খ্ৰীষ্টানধৰ্মী লোক । সেয়েহে তেওঁলোকে এটা ধৰ্মীয় প্ৰতিষ্ঠানৰ প্ৰয়োজনীয়তা অনুভৱ কৰিছিল । সেই অনুসৰি পাণবজাৰত গুৱাহাটী খ্ৰীষ্ট চাৰ্জৰ প্ৰতিষ্ঠা কৰে । ১৮৪৪ প্ৰতিষ্ঠা কৰা গীৰ্জাটো ১৮৫৬ ৰ ভয়াৱহ ভূমিকম্পত ভাগি যোৱাৰ পিছত ১৮৬১ ত পুনৰ গীৰ্জাঘৰ নিৰ্মাণ কৰা হয় । দ্বিতীয়টো গীৰ্জা ঘৰতো ১৮৯৭ৰ ভূমিকম্পত ভাগি যোৱাৰ পিছত ১৯০১ চনত পুণৰ নিৰ্মাণ কৰা হয় । এই গীৰ্জাঘৰটো ১৯৭৮ ত পুনৰ মেৰামতি কৰা হয় । বৰ্তমান থকা অসম আৰ্হিৰ গীৰ্জা ঘৰটো শেহতীয়াকৈ ২০১৭ চনত মেৰামতি কৰা হৈছে ।"
১৮৪৪ চনত গীৰ্জাটো নিৰ্মাণ কৰাৰ সময়ত জেমছ মেথি, ফ্ৰান্সিছ জেনকিন্স, কেপ্টেইন ই টি ডাল্টন, কেপ্টেইন ই এ ৰোলাট, এল টি এগনিউ, এল টি এইচ এছ বিভাৰ নিৰ্মাণ কমিটীৰ সদস্য আছিল । প্ৰতি বছৰে বৰদিন উলহ-মালহেৰে পালন কৰা এই গীৰ্জাটোত এইবাৰ বৰদিনৰ দিনটোত ২০-৩০ হাজাৰ লোকৰ সমাগম হোৱাৰ আশা ব্য়ক্ত কৰে গীৰ্জাটোৰ মুখ্য তত্বাৱধায়ক হেৰিচন মাচিয়ে ।
