যোৰহাট, ৭ ছেপ্টেম্বৰ:ৰাজ্য়ত অব্য়াহত আছে হাতী-মানুহৰ সংঘাত । এই সংঘাতৰ মাজতেই যোৰহাট জিলাৰ মৰিয়নীত শনিবাৰে পুৱাই সংঘটিত হয় এক হৃদয়বিদাৰক ঘটনা । এটা বৃহৎ হাতীৰ জাকৰ আক্ৰমণত মৃত্য়ু হয় বাগিচখনৰ এজন শ্ৰমিকৰ । এই ঘটনাটো সংঘটিত হোৱাৰ পিছতেই স্থানীয় শ্ৰমিকসকলে যোৰহাট জিলা বন বিভাগৰ বিৰুদ্ধে ক্ষোভ প্ৰকাশ কৰে ।
ঘটনাৰ বিৱৰণি অনুসৰি, শনিবাৰে পুৱাই গিবন অভায়ৰণ্যৰ পৰা খাদ্যৰ সন্ধানত ওলাই আহে এটা বৃহৎ হাতীৰ জাক । এই হাতীৰ জাকটোৱে খাদ্যৰ সন্ধানত মৰিয়নী ডকলঙীয়াৰ কলিয়াপানী চাহ বাগিচাত প্ৰৱেশ কৰে । সেই সময়ত প্ৰাতঃকৃত্য়ৰ বাবে উক্ত বাগিচাখনৰ এজন শ্ৰমিক তাত উপস্থিত হয় । চকুৰ সন্মুখত হাতীৰ জাকটো দেখি গণ মুণ্ডা(৩৫) নামৰ শ্ৰমিকজনে এই জাকটোক খেদিবলৈ আগুৱাই যাওতেই তেওঁক আক্ৰমণ কৰে । হাতীৰ আক্ৰমণত ঘটনাস্থলীতেই মৃত্য়ু হয় শ্ৰমিকজনৰ ।
এজন শ্ৰমিকে বন্যহস্তীৰ গচকত অকালতে মৃত্যুক সাৱটিবলগীয়া হোৱাত শ্ৰমিক ৰাইজে সম্পূৰ্ণৰূপে জগৰীয়া কৰিছে যোৰহাট জিলা বন বিভাগক । হাতী অহা-যোৱা কৰা স্থানত বন বিভাগক ষ্ট্ৰীট লাইটৰ ব্যৱস্থা কৰিবলৈ তেওঁলোকে বাৰম্বাৰ দাবী জনাই আহিছে । লগতে বন বিভাগৰ টহলৰ ব্যৱস্থা কৰিবলৈও শ্ৰমিকসকলে দাবী জনাই অহাৰ পিছতো আজিলৈকে বিভাগটোৱে কোনো গুৰুত্ব প্ৰদান কৰা নাই বুলি অভিযোগ উত্থাপন কৰে ।
- এককালীন সাহাৰ্য আৰু কৰ্মসংস্থাপন দিবলৈ দাবী