নলবাৰী, ২০ মে’ :দেওবাৰে নিশা নলবাৰী জিলাৰ প্ৰান্তত ধুমুহা বৰষুণৰ সমানেই বজ্ৰপাতৰ তাণ্ডৱ । ধুমুহা-বৰষুণৰ ফলত প্ৰকাণ্ড গছ আৰু বিদ্যুতৰ খুঁটা চিঙি পৰাত ভাঙি চূৰমাৰ হয় কেইবাটাও ঘৰ । জিলাখনৰ পশ্চিম নলবাৰীৰ দৌকুছি, শনিৰোড, পানীগাঁও, পকোৱা, জাগাৰা, খৈৰাবাৰীকে আদি কৰি বিভিন্ন অঞ্চলত বিস্তীৰ্ণ ক্ষতিসাধন কৰাৰ সমান্তৰালভাৱে বজ্ৰ পৰি পশুধন মৃত্য়ুমুখত পৰিছে ।
জিলাখনৰ মুকালমুৱাৰ চৰাঞ্চলত দেওবাৰে নিশা হোৱা ধুমুহা, বজ্ৰপাতত বিস্তৰ ক্ষতিসাধন হয় । ২নং কাপলাবৰী চৰৰ কপিল আলী নামৰ লোকজনৰ বিস্তৰ ক্ষতি সাধন হয় । যোৱা নিশা অহা বৰষুণ ধুমুহাৰ সময়তেই বজ্ৰ পৰি জুইৰ সূত্ৰপাত হোৱাৰ ফলত ঘৰটোত থকা ৩টা গৰু, ৬টা ভেড়া আৰু ছাগলী এটাৰ মৃত্যু হয় । লগতে প্ৰয়োজনীয় নথি পত্ৰৰ লগতে নগদ ১০ হাজাৰ টকা ভস্মীভূত হয় । ইতিমধ্যে পৰিয়ালৰ লোকে স্থানীয় গাঁও প্ৰধান , আৰক্ষী প্ৰশাসনৰ লগতে বৰক্ষেত্ৰী ৰাজহ চক্ৰ বিষয়াক এই সন্দৰ্ভত অৱগত কৰিছে । দুৰ্ভগীয়া পৰিয়ালটোক চৰকাৰ তথা প্ৰশাসনক সহায় কৰিবলৈ আহ্বান জনাইছে স্থানীয় লোকে।