বাক্সা: ভাৰত আৰু ভূটান অতীজৰে পৰাই মৈত্ৰী বন্ধনত আৱদ্ধ হৈ আহিছে । এই মৈত্ৰী বন্ধনক আৰু অধিক নিখুঁত আৰু সুদৃঢ় কৰাৰ লক্ষ্য আগত ৰাখি বৃহস্পতিবাৰে অসমৰ ভূমি বন্দৰ হিচাবে পৰিচিত দৰঙাত ইমিগ্ৰেচন তালাচী চকী ইমিগ্ৰেচন চেক পোষ্ট (আইচিপি) উদ্বোধন কৰা হয় । ভূটান সীমান্তৰ পৰা মাত্ৰ ৭০০ মিটাৰ দূৰৈত অৱস্থিত এই ভূমি বন্দৰটো আঞ্চলিক সংযোগ আৰু অৰ্থনৈতিক বিকাশ বৃদ্ধিৰ বাবে এক গুৰুত্বপূৰ্ণ হিচাবে বিবেচিত হৈছে ।
উদ্বোধনী অনুষ্ঠানত অসমৰ ৰাজ্যপাল লক্ষ্মণ প্ৰসাদ আচাৰ্য আৰু ভূটানৰ প্ৰধানমন্ত্ৰী দাশো শ্বেৰিং টোবগে উপস্থিত থাকে । ১৪.৫ একৰ ভূমি আৱৰি থকা এই আইচিপি দৰঙাত সীমান্ত পাৰ হৈ কৰা ভ্ৰমণ আৰু বাণিজ্য সুশৃংখলিত কৰাৰ অৰ্থে অত্যাধুনিক ব্যৱস্থা থাকিব । তামুলপুৰ জিলাৰ ভূটান সীমান্তৰ ভূমি বন্দৰ দৰঙাত এক কাৰ্যসূচীৰ জৰিয়তে আন্তঃপ্ৰব্ৰজন তালাচী চকীক আৰু অধিক মজবুত কৰাৰ বাবে দুয়োখন দেশৰ তৰফৰ পৰা এক পদক্ষেপ গ্ৰহণ কৰা হৈছে ।