জীৱনদায়িনী ঔষধৰ মূল্য বৃদ্ধিক লৈ প্ৰতিক্ৰিয়া
গুৱাহাটী, ১ এপ্ৰিল: আজিৰে পৰা পুনৰ দাম বাঢ়িল জীৱনদায়িনী ঔষধৰ । মুঠতে ঔষধ কিনাটো এতিয়া সাধাৰণ মানুহৰ বাবে আৰু কঠিন হৈ পৰিব । দুখীয়া, মধ্যবিত্ত তথা সৰ্বসাধাৰণ মানুহে শ্রম কৰি নিজৰ খোৱাখিনি কোনোমতে যোগাৰ কৰিব পাৰিলেও ঔষধ কিনাটো হয়তো আৰু সম্ভৱ হৈ নুঠিব । এফালে বিনামূলীয়া চাউল আনফালে ঔষধৰ মূল্য বৃদ্ধি । কেইদিনমানৰ আগলৈকে ৫০০ টকাত পোৱা চাৰিটা ছ’ডিয়াম টেবলেটৰ দাম বাঢ়ি ইতিমধ্যেই ৭৬৪.৯৫ টকা হ'ল ।
ইফালে ৫৫ টকাত পোৱা প্ৰেচাৰৰ টেবলেটৰ দাম ১১৫ টকা হ'ল । দাম বৃদ্ধি কৰা ঔষধ কোম্পানীসমূহে শাসকীয় বিজেপি দলক নিৰ্বাচনী বণ্ডৰ জৰিয়তে ৯১১ কোটি টকাৰ চান্দা দিয়াৰ অভিযোগ উঠিছে । সেই টকা ঘূৰাই অনাৰ বাবেই ঔষধৰ দাম বৃদ্ধি কৰি জনতাক ঔষধ কোম্পানীয়ে ৰামটাঙোন সোধোৱা বুলিও চর্চা হৈছে । ইয়াৰ পূৰ্বে ১২ শতাংশ ঔষধৰ দাম বৃদ্ধি পাইছিল । ২০২২ চনতো ১০ শতাংশ বৃদ্ধি পাইছিল ।