ভোট জলকীয়াই হাঁহি বিৰিঙাইছে গনেশ কুলিৰ মুখত
জোনাই,২৭ এপ্ৰিল:নিবনুৱা সমস্যাই গ্ৰাস কৰা সমগ্ৰ অসমৰ হাজাৰ হাজাৰ যুৱক-যুৱতী ঢাপলি মেলিছে বহিঃৰাজ্যলৈ । কিন্তু তেনে সময়তে বহু যুৱকে দেখুৱাইছে নিদৰ্শন । কৃষি-কৰ্মৰে স্বাৱলম্বিতাৰ বাট বুলিছে বহু যুৱক যুৱতীয়ে । "মন থাকিলে চন, বাকৰিৰ মাটিতে ধন" আপ্ত এই অসমীয়া বাক্যশাৰী বাস্তৱত ৰূপায়িত কৰিছে জোনাইৰ এজন শিক্ষিত যুৱকে ।
নিজৰ চোতালত থকা চাৰি বিঘা মাটিত ভোট জলকীয়া খেতিৰে স্বাৱলম্বী হোৱাৰ সুন্দৰ নিদৰ্শন দাঙি ধৰিছে জোনাইৰ চন্দ্ৰপুৰৰ নিবাসী গনেশ কুলিয়ে । যি সময়ত ৰাজ্যৰ ভিন্ন প্ৰান্তৰ একাংশ শিক্ষিত যুৱক যুৱতীসকলে কৰ্ম সংস্থাপন বিচাৰি বিভিন্ন সময়ত বহিঃৰাজ্যলৈ ঢাপলি মেলিছে অথবা এটা চৰকাৰী চাকৰিৰ বাবে হাবাথুৰি খাবলগীয়া হৈছে তেনে সময়তে জোনাইৰ এইজন যুৱকে নিজৰ চোতালত থকা মাটিত ভোট জলকীয়া খেতি কৰি জীৱিকাৰ পথ বাছি লৈছে ।