মাজুলী, ১৪ অক্টোবৰ: স্বাস্থ্য়খণ্ডত অভূতপূৰ্ব উন্নয়ন হোৱা বুলি চৰকাৰে দাবী কৰাৰ সময়তেই ঠেলাত কঢ়িয়াবলগীয়া হৈছে মৃতদেহ । তাকো এক বা দুই কিলোমিটাৰ নহয়, ২০ কিলোমিটাৰ ঠেলাত কঢ়িয়ালে মৃতদেহ । চিকিৎসালয়ৰ পৰা মৃতদেহ ঘৰলৈ অনাৰ সময়তেই বিপদে লগ এৰা নিদিয়া এটা দুৰ্ভগীয়া পৰিয়ালৰ এই ছবিখনে প্ৰতিফলিত কৰিছে স্বাস্থ্য়খণ্ডত হোৱা উন্নয়নৰ স্বৰূপ ।
সত্ৰপীঠ মাজুলীত সংঘটিত হৈছে এক হৃদয় বিদাৰক ঘটনা । ঘটনা অনুসৰি যোৱা দেওবাৰে নিশা প্ৰায় ৯.৩০ বজাত চামগুৰি বনিয়া গাঁৱৰ দীপালী সেনাপতি নামৰ এগৰাকী মহিলাক ১০৮ সেৱাৰে গড়মূৰ জিলা চিকিৎসাললৈ নিয়া হৈছিল । গড়মূৰ চিকিৎসালয়ত উপস্থিত হোৱাৰ পাছত এম্বুলেঞ্চখনৰ ওপৰতে চিকিৎসকে পৰীক্ষা কৰি মহিলাগৰাকীক মৃত বুলি ঘোষণা কৰে ।
নিশা গড়মূৰ জিলা চিকিৎসালয়ৰ পৰা দীপালী সেনাপতিৰ মৃতদেহ ঘৰলৈ অনাৰ সময়তেই পাঁচ কিলোমিটাৰ অহাৰ পাছত পথত বিকল হয় স্বৰ্গৰথ । নিশা ১২.৩০ বজাত সংঘটিত হয় এই ঘটনাটো । স্বৰ্গৰথ বিকল হোৱাত প্রায় ২০ কিলোমিটাৰ দূৰৰ চামগুৰি বনিয়া গাঁৱৰ পৰা পৰিয়ালৰ লোকে এখন ঠেলা নি ঘৰলৈ আনিব লগা হয় মহিলাগৰাকীৰ মৃতদেহ ।