গুৱাহাটী, ২৪ জুলাই : পৰিয়ালকেন্দ্ৰিক বিবাদেই ৰমেন বৰুৱা নিৰুদ্দেশৰ কাৰণ বুলি প্ৰায়সংখ্যক লোকৰ লগতে আৰক্ষীও নিশ্চিত হৈছে ৷ কিন্তু এই সন্দৰ্ভত পৰিয়ালৰ লোকৰ পৰা আহিছে বিপৰীত ভাষ্য ৷
সংবাদ মাধ্যমক উভতি ধৰিলে ব্ৰজেন বৰুৱাৰ কন্যাই (ETV Bharat Assam) ভাতৃ দ্বীপেন বৰুৱাই ৰমেন বৰুৱাৰ সৈতে কন্যা বৰ্ণিকা বৰুৱাৰ বিবাদৰ কথা অকপতে স্বীকাৰ কৰিছে যদিও আন এগৰাকী ভাতৃ ব্ৰজেন বৰুৱাৰ কন্যাই এইক্ষেত্ৰত বিপৰীত ভাষ্য প্ৰদান কৰিছে ৷ সামাজিক মাধ্যমত চৰ্চা চলি থকা এটা বিশেষ ফেচবুক পোষ্টৰ প্ৰসংগ টানি আনি সাংবাদিকক ওলোটাই প্ৰশ্ন কৰে ব্ৰজেন বৰুৱাৰ কন্যা মনানী বেজবৰুৱাই ৷ এই বিবাদৰ তথ্য কেনেদৰে লাভ কৰিলে বুলিহে প্ৰশ্ন কৰে ব্ৰজেন বৰুৱাৰ কন্যাই ৷ উল্লেখ্য যে কন্যাই ৰমেন বৰুৱাক আতিশয্য চলাই অহাৰ সন্দৰ্ভত সামাজিক মাধ্যমত উক্ত পোষ্টটোত উল্লেখ কৰা হৈছিল ৷
আনহাতে আৰক্ষীৰ ভাষ্য অনুসৰি ৰমেন বৰুৱা নিৰুদ্দেশ হোৱাৰ আঁৰত আছে ব্যক্তিগত আৰু ঘৰুৱা অশান্তি । এতিয়া এই তিনি পক্ষৰ ভাষ্যই ৰমেন বৰুৱাৰ নিৰুদ্দেশৰ কাৰণটো অধিক জটিল কৰি তুলিছে । দ্বীপেন বৰুৱাই সংবাদ মাধ্যমৰ আগত কয়, ‘‘ ৰমেন বৰুৱাৰ পত্নী ঢুকুৱাৰ পিচত মাতৃৰ চাকৰি কন্যাই লাভ কৰিছিল ৷ কাহিলীপাৰাত ভাৰাঘৰত থাকিছিল ৷ কেবামাহ পূৰ্বে ভাৰাঘৰৰ পৰা পিতৃগৃহলৈ ঘৰলৈ আহিছিল কন্যা বৰ্ণিকা বৰুৱা । পিতৃ আৰু কন্যাৰ মাজত কাজিয়াৰ সূত্ৰপাত হৈছিল । নিৰুদ্দেশ হোৱাৰ দিনাও পুৱা কন্যাৰ চিঞৰ-বাখৰ শুনা গৈছিল ৷’’
কিন্তু কি কাৰণে কন্যাই ৰমেন বৰুৱাক উদ্দেশ্যি চিঞৰ-বাখৰ কৰিছিল সেই বিষয়ে জ্ঞাত নহয় দ্বীপেন বৰুৱা । উল্লেখ্য যে ৰমেন বৰুৱা আৰু দ্বীপেন বৰুৱা ঐতিহ্যমণ্ডিত ঘৰখনত কোনোধৰণৰ আধুনিক নিৰ্মাণকাৰ্য চলোৱাৰ পক্ষপাতি নহয় ৷ এই কথা উল্লেখ কৰি দ্বীপেন বৰুৱাই কয় যে তেওঁলোকৰ জীৱিত অৱস্থাত থকালৈকে ঐতিহ্যমণ্ডিত বাসগৃহটো এনেদৰে ৰখাৰ সিদ্ধান্ত লৈছে আৰু তেওঁলোকৰ অবৰ্তমানত ইয়াত তাজমহল বনালেও তেওঁলোক চাবলৈ নাহে ৷
ইপিনে ৰমেন বৰুৱাক কন্যা বৰ্ণিকা বৰুৱাই অত্যাচাৰ কৰা বুলি উঠা অভিযোগক নস্যাৎ কৰে ব্ৰজেন বৰুৱাৰ কন্যাই ৷ সাংবাদিকে এই কথা সোধাত সাংবাদিকৰ ওপৰতে খৰ্গহস্ত হয় মনানী বেজবৰুৱা । আনহাতে মহানগৰ আৰক্ষী আয়ুক্ত দিগন্ত বৰাই ব্যক্তিগত আৰু পৰিয়ালকেন্দ্ৰিক অশান্তিৰ বাবেই স্ব-ইচ্ছাই শিল্পী ৰমেন বৰুৱা ঘৰৰ পৰা ওলাই যোৱা বুলি প্ৰকাশ কৰে ৷ উল্লেখ্য যে সোমবাৰৰ পৰাই ৮০ ৰ উৰ্ধৰ যশস্বী শিল্পী ৰমেন বৰুৱা সন্ধানহীন হোৱাৰ ঘটনাই ৰাজ্যবাসীক উদ্বিগ্ন কৰি তুলিছে ।
সোমবাৰে পুৱা প্ৰায় ১০ বজাৰ পৰা তেওঁ সন্ধানহীন হৈ আছে । প্ৰসিদ্ধ শিল্পীগৰাকীয়ে গুৱাহাটীৰ লতাশিলস্থিত বাসভৱনৰ পৰা সমীপৰ লতাশিল গণেশ মন্দিৰলৈ বুলি ওলাই গৈছিল । ইয়াৰ পিচত দুপৰীয়াপর্যন্ত তেওঁ ঘৰলৈ ঘূৰি নহাত পৰিয়ালৰ সদস্যই শিল্পীগৰাকীৰ লগত থকা ম’বাইললৈ ফোনলৈ কল কৰে যদিও ছুইচ অফ পায় । এই লৈ পৰিয়ালৰ সদস্যসকল চিন্তিত হৈ পৰে । তেওঁলোকে সম্ভাব্য সকলো স্থানতে বিচাৰ-খোঁচাৰ কৰিও নিশাপর্যন্ত শিল্পীগৰাকীৰ সম্ভেদ উলিয়াব নোৱাৰি লতাশিল আৰক্ষীৰ ওচৰ চাপে । ঘটনা সন্দৰ্ভত ৰমেন বৰুৱাৰ পৰিয়ালে লতাশিল থানাত এজাহাৰ দাখিল কৰে ৷ তাৰ পিচৰে পৰা মহানগৰ আৰক্ষীয়ে শিল্পীগৰাকীৰ সন্ধানত অভিযান অব্যাহত ৰাখিছে ৷
লগতে পঢ়ক :খবৰ ওলোৱা নাই ৰমেন বৰুৱাৰ: কন্যা বৰ্ণিকাক তলব লতাশিল আৰক্ষীৰ, চলাব জেৰা
