ধুবুৰী : অসমকন্যা তথা গোৱালপৰীয়া লোকসংগীতৰ সম্ৰাজ্ঞী প্ৰতিমা বৰুৱা পাণ্ডেৰ আজি ২২সংখ্যক মৃত্যু দিৱস । এই পবিত্ৰ দিনটোত গৌৰীপুৰ চহৰৰ ইতিহাস প্ৰসিদ্ধ প্ৰমথেশ বৰুৱা মহাবিদ্যালয়ৰ অধ্যক্ষসকলে শিল্পীগৰাকীলৈ সশ্ৰদ্ধ প্ৰণিপাত জনায় । প্ৰতিমা বৰুৱা পাণ্ডেৰ প্ৰতিমূৰ্তিত মাল্য অৰ্পণ কৰি তেওঁলৈ শ্ৰদ্ধাঞ্জলি জ্ঞাপন কৰে অধ্যক্ষসকলে ৷
প্ৰয়াত শিল্পীগৰাকীৰ মৃত্যু বাৰ্ষিকীৰ দিনটোত তেওঁৰ বাসগৃহ চহৰ মাটিয়াবাগত অৱস্থিত আবক্ষ মূৰ্তিত পুৱাৰে পৰাই শিক্ষাবিদ, ছাত্ৰ সমাজ, ৰাজপৰিয়ালৰ সদস্যৰ লগতে বহু গুণমূগ্ধই চাকি-ধূপ জ্বলাই শ্ৰদ্ধাঞ্জলি জ্ঞাপন কৰে । আজিৰ এই বিশেষ দিনটোৰ লগত সংগতি ৰাখি প্ৰয়াত শিল্পীগৰাকীৰ ঢোল বাদকক বঁটা প্ৰদান কৰা হ’ব ।
প্ৰতিমা বৰুৱা পাণ্ডেৰ মৃত্যু দিৱসত ৰাজ পৰিয়ালৰ সদস্যই কয় যে প্ৰয়াত শিল্পীগৰাকীৰ গীতবোৰ একাংশ লোকে জনপ্ৰিয়তা অৰ্জনৰ বাবে বিকৃতভাৱে উপস্থাপন কৰিছে, সেয়া বন্ধ হ’ব লাগে । প্ৰয়াত মহান শিল্পী প্ৰতিমা বৰুৱা পাণ্ডে এগৰাকী শক্তিশালী আৰু চতুৰ চিকাৰী আছিল বুলি গৌৰীপুৰৰ নাগৰিকৰ মুখে মুখে শুনা যায় ৷ আজিও ৰাজপৰিয়ালৰ হাৱামহলত বন্দুককে ধৰি বিভিন্ন বস্তু সযতনে সংৰক্ষণ কৰি ৰখা হৈছে ।
আনহাতে ধুবুৰী প্ৰেছ ক্লাবেও অস্থায়ী ধুবুৰী প্ৰেছ ক্লাবৰ বাকৰিত শিল্পীগৰাকীক স্মৰণ কৰি শ্ৰদ্ধাঞ্জলি জ্ঞাপন কৰে ৷ প্ৰেছ ক্লাবৰ ফালৰ পৰা ধুবুৰীত এটা পূৰ্ণাংগ প্ৰতিমূৰ্তি নিৰ্মাণ কৰাৰ সিদ্ধান্ত লোৱা হয় । যিহেতু এতিয়ালৈ ধুবুৰীৰ চহৰত মহান শিল্পীগৰাকীৰ এটাও প্ৰতিমূৰ্তি নাই সেয়ে প্ৰেছ ক্লাবৰ সভাপতি ৰাজীৱ শৰ্মাই শিল্পীগৰাকীক স্মৰণ কৰি অতি সোনকালে এটা পূৰ্ণাংগ প্ৰতিমূৰ্তি নিৰ্মাণ কৰাৰ কথা ঘোষণা কৰে ।
১৯৩৫ চনৰ ৩ অক্টোবৰত কলিকতাত জন্ম হৈছিল প্ৰতিমা বৰুৱা পাণ্ডেৰ । তেখেতৰ পিতৃৰ নাম প্ৰাকৃতিশ বৰুৱা । তেখেতে কলিকতাৰে 'গোখলে মেম'ৰিয়েল স্কুল'ৰ পৰা আৰম্ভ কৰিছিল শিক্ষা জীৱন ৷ বিদ্যালয়ত তেখেতে ৰবীন্দ্ৰ সংগীত শিকিছিল যদিও তেখেতে সংগীতৰ বাবে কোনো আনুষ্ঠানিক শিক্ষাগ্ৰহণ কৰা নাছিল ।
