বিপণিত হেঁপাহৰ গ্ৰন্থখন বিচাৰি গ্ৰন্থপ্ৰেমীৰ ভিৰ

নৱবৰ্ষৰ পহিলা দিনটোত লোকাৰণ্য হৈ পৰিল অসম গ্ৰন্থমেলাৰ বাকৰি ৷ ২৭ ডিচেম্বৰৰ পৰা ১ জানুৱাৰী পৰ্যন্ত ২ কোটি ৭০ লাখ টকাৰ গ্ৰন্থ বিক্ৰী হৈছে ৷

গুৱাহাটী :নৱবৰ্ষৰ পহিলা দিনটোত লোকাৰণ্য হৈ পৰিল খানাপাৰা পশু চিকিৎসা মহবিদ্যালয় খেলপথাৰত আয়োজন কৰা অসম গ্ৰন্থমেলা, গুৱাহাটীৰ বাকৰি ৷ অসম প্ৰকাশন পৰিষদ আৰু সদৌ অসম পুথি প্ৰকাশক আৰু বিক্ৰেতা সংস্থাই যৌভভাৱে আয়োজন কৰা এই গ্ৰন্থমেলাত পুৱাৰে পৰা বহু লোকৰ সমাগম হোৱা দেখা যায় ৷

অৱশ্যে বুধবাৰে পুৱাৰ ভাগত যদিও মানুহৰ সমাগম কম আছিল সন্ধিয়ালৈ জনস্ৰোতে কেইবাহাজাৰৰ সীমা অতিক্ৰম কৰা দেখিবলৈ পোৱা গ’ল ৷ গ্ৰন্থৰ সান্নিধ্যত বছৰৰ প্ৰথম দিনটো উদযাপন কৰিবলৈ পুথিপ্ৰেমী বিদ্বৎ সমাজ, জ্ঞানান্বেষী শিক্ষাৰ্থী আৰু লেখক-সাহিত্যিকৰ এনে বিশাল সমাৱেশে খানাপাৰাৰ বাকৰিত উৎসৱৰ লহৰ সৃষ্টি কৰে ৷

বিপণিত হেঁপাহৰ গ্ৰন্থ ক্ৰয় কৰি নৱবৰ্ষ ২০২৫ ক স্বাগত জনাই নিৰ্মল আনন্দ উপভোগ কৰে হেজাৰ হেজাৰ পঢ়ুৱৈয়ে ৷ অৱশ্যে বুধবাৰৰ দিনটোত কিতাপ বিক্ৰীৰ সংখ্যাও আশাব্যঞ্জক আছিল বুলি সদৰী কৰিছে অসম প্ৰকাশন পৰিষদৰ লগতে আন আন প্ৰকাশন গোষ্ঠীসমূহে ৷

যোৱা ২৭ ডিচেম্বৰৰ পৰা ১ জানুৱাৰী পৰ্যন্ত ২ কোটি ৭০ লাখ টকাৰ গ্ৰন্থ বিক্ৰী হোৱা বুলি জনাইছে প্ৰকাশন পৰিষদৰ সচিব প্ৰমোদ কলিতাই ৷ ইপিনে বুকধবাৰৰ দিনটোত অনুষ্ঠিত হয় যুৱ লেখকৰ সন্মিলন । য’ত উপস্থিত থাকে পশ্চিমবংগৰ বিশিষ্ট সাহিত্যিক বিনোদ ঘূচাল ।

উল্লেখ্য যে, এইবাৰৰ গ্ৰন্থমেলাত কেইবাখনো গ্ৰন্থই পঢ়ুৱৈ সমাজৰ মাজত বিশেষ চৰ্চা লাভ কৰা দেখা গৈছে । তাৰ ভিতৰত অন্যতম হৈছে জ্যেষ্ঠ সাংবাদিক নিতুমনি শইকীয়াৰ বিজেপিক ‘‘কিয় ভোট দিব নালাগে’’ শীৰ্ষক গ্ৰন্থখন । লগতে খনিন্দ্ৰ কুমাৰ ডেকাৰ দেশৰ প্ৰয়াত উদ্যোগপতি "ৰতন টাটা", জিতুমণি বৰাৰ "হেৰাই যোৱা দেউতাক" নামৰ গ্ৰন্থখনে বিশেষ সমাদৰ লাভ কৰিছে ।

লগতে পঢ়ক :এইবাৰৰ গ্ৰন্থমেলাত নাই বাংলাদেশৰ আকৰ্ষণ: অস্থিৰতাত চুবুৰীয়া ৰাষ্ট্ৰখন লগতে পঢ়ক :হিংসা-বিদ্বেষৰ প্ৰভাৱ পৰিল কিতাপতো ! গ্ৰন্থমেলাত নাথাকিব বাংলাদেশৰ বিপণি