তেজপুৰ,২৭ মাৰ্চ:প্ৰথম পৰ্যায়ৰ নিৰ্বাচনৰ মনোনয়ন দাখিলৰ অন্তিম দিনটোত শাসক-বিৰোধীৰ প্ৰাৰ্থীসকলে দাখিল কৰে মনোনয়ন পত্ৰ । শোণিতপুৰ লোকসভা সমষ্টিৰ প্ৰায় ৬ গৰাকী প্ৰাৰ্থীয়ে বুধবাৰৰ দিনটোত দাখিল কৰে মনোনয়ন পত্ৰ । সমান্তৰালভাৱে ১১ নং শোণিতপুৰ লোকসভা সমষ্টিৰ আম আদমি পাৰ্টীৰ প্ৰাৰ্থী ঋষিৰাজ কৌণ্ডিন্যয়ো দাখিল কৰে মনোনয়ন পত্ৰ । শোণিতপুৰ জিলা ৰিটাৰ্ণিং অফিচাৰ দেৱ কুমাৰ মিশ্ৰৰ হাতত নিজৰ মনোনয়ন দাখিল কৰে AAP ৰ প্ৰাৰ্থীগৰাকীয়ে ।
ইয়াৰ পূৰ্বে তেজপুৰৰ কলেজিয়েট হাইস্কুলৰ খেলপথাৰৰ পৰা এক বিশাল ৰেলী কৰি চহৰখনৰ মাজমজিয়াৰে শোণিতপুৰ জিলা আয়ুক্ত কাৰ্যালয়ত উপস্থিত হয় ঋষিৰাজ কৌণ্ডিন্য । পুৱা তেজপুৰ চহৰৰ ঐতিহাসিক গণেশ মন্দিৰ, গীৰ্জা আৰু মছজিদত প্ৰৱেশ কৰি সপত্নীক ঋষিৰাজ কৌণ্ডিন্যই প্ৰাৰ্থনা জনাই মনোনয়ন পত্ৰ দাখিলৰ বাবে সাজু হয় । আম আদমি পাৰ্টীৰ প্ৰাৰ্থীগৰাকীয়ে মনোনয়ন পত্ৰ দাখিলৰ পূৰ্বে সাংবাদিকৰ আগত কয় যে এইবাৰ ৰাইজে স্বতঃস্ফূৰ্তভাৱে আপক ভোট দিব ।