গুৱাহাটী : অসম জাতীয় বিদ্যালয়ৰ এটি কণমানি শিশুৰ কৃতিত্ব । লেখকৰ ৰূপত আত্মপ্ৰকাশ কৰিছে এটি কণমানি শিশুৱে । ‘‘সৃহানৰ পাঁচটা সাধু’’ নামেৰে শিশুসুলভতাৰে ৭ বছৰীয়া সৃহান দত্তই লিখিছে এখন সাধুৰ পুথি ।
সৃহান দত্ত হৈছে গুৱাহাটীৰ নুনমাটিস্থিত অসম জাতীয় বিদ্যালয়ৰ দ্বিতীয় শ্ৰেণীৰ ছাত্ৰ । সোমবাৰে অসম জাতীয় বিদ্যালয়ত আনুষ্ঠানিকভাৱে পুৱাৰ সমাৱেশত এই সাধুপুথিখন উন্মোচন কৰে বিদ্যালয়খন উপাধ্যক্ষ অপৰাজিতা বৰা, পংকজ দত্ত আৰু ৰবীন্দ্ৰ বৰ্মনসহ অন্যান্য শিক্ষক-শিক্ষয়িত্ৰীসকলে ।
অসমীয়া ভাষাৰ সৰ্বকনিষ্ঠ শিশু লেখক ৭ বছৰীয়া সৃহানৰ সাধুপুথি প্ৰকাশ (ETV Bharat Assam)
এই কাৰ্যসূচীত সৃহানৰ পিতৃ গল্পকাৰ-সাংবাদিক পংকজ কুমাৰ দত্ত আৰু মাতৃ কাব্যশ্ৰী মহন্তও উপস্থিত থাকে । পুত্ৰৰ শিশু মনৰ সৃষ্টিৰাজিক উৎসাহিত কৰাৰ মানসেৰে সৃহানৰ পাঁচটা সাধু প্ৰকাশ কৰিছে সৃহানৰ পিতৃ-মাতৃ পংকজ কুমাৰ দত্ত আৰু কাব্যশ্ৰী মহন্তই ৷
কণমানি সৃহান (ETV Bharat Assam)
বিশিষ্ট গ্ৰন্থ সংকলক-সাংবাদিক শান্তনু কৌশিক বৰুৱাৰ তথ্য মতে, সৃহান বৰ্তমান অসমীয়া ভাষাৰ সৰ্বকনিষ্ঠ লেখক ৷ তথ্য মতে, ইয়াৰ পূৰ্বে ২০০২ চনত অসম জাতীয় বিদ্যালয়ৰ সেই সময়ৰ আঠ বছৰ বয়সৰ শিক্ষাৰ্থী ছাকিল ইনজাম হোছেইন আছিল অসমৰ সৰ্বকনিষ্ঠ লেখক । ছাকিলে ‘‘ঢৌ খেলা শৈশৱ’’ নামৰ এখন কবিতাৰ কিতাপ লিখিছিল ।
