গুৱাহাটী, ২৫ জুন :শেহতীয়াকৈ ৰাজ্যত বান পৰিস্থিতি কিছু উন্নত হৈছে । অৱশ্যে এতিয়াও ৰাজ্যৰ ৯ খন জিলা বানৰ কবলত আছে । অসম ৰাজ্যিক দুৰ্যোগ ব্যৱস্থাপনা প্ৰাধিকৰণৰ (Assam disaster management authority) ৰ শেহতীয়া তথ্য মতে, অসমৰ ৯ খন জিলা ক্ৰমে কামৰূপ, গোৱালপাৰা, বঙাইগাঁও, কৰিমগঞ্জ, কাছাৰ, দৰং, নগাঁও, বৰপেটা, হোজাই জিলা বানৰ কবলত আছে ৷
তথ্য অনুসৰি, সোমবাৰে বানৰ ফলত ৰাজ্যত এজন লোকৰ মৃত্যু হৈছে । মৃত্যু হোৱা লোকজন কাছাৰ জিলাৰ বাসিন্দা বুলি জানিব পৰা গৈছে । এতিয়ালৈকে লাভ কৰা তথ্য মতে, বানৰ ফলত চলিত বছৰত মৃত্যু হোৱা লোকৰ সংখ্যা ৩০ জনলৈ বৃদ্ধি পাইছে ।
লগতে পঢ়ক :বানৰ কবলত ১২ খন জিলাৰ তিনি লাখ লোক : মৃত্যুৰ সংখ্যা ২৯ গৰাকীলৈ বৃদ্ধি - Assam Flood 2024
অসম ৰাজ্যিক দুৰ্যোগ ব্যৱস্থাপনা প্ৰাধিকৰণৰ শেহতীয়া তথ্য মতে, অসমৰ ৯ খন জিলা ক্ৰমে কামৰূপ, গোৱালপাৰা, বঙাইগাঁও, কৰিমগঞ্জ, কাছাৰ, দৰং, নগাঁও, বৰপেটা, হোজাই জিলাৰ ৬৪১ খন গাঁও এতিয়াও বানত বুৰ গৈ আছে । কৰিমগঞ্জ জিলাত ২৪৪ খন আৰু কামৰূপ জিলাত ২৩৯ খন সৰ্বাধিক গাঁও এতিয়াও পানীৰ তলত আছে । এই বানত এতিয়াও ৯৬, ৪৪০ লোক ক্ষতিগ্ৰস্ত হৈ থকাৰ তথ্য লাভ কৰা হৈছে ।
উল্লেখ্য যে, বানপানী যদিও কিছু হ্ৰাস পাইছে তথাপি এতিয়াও ৰাজ্যত ১৪০ টা আশ্ৰয় শিবিৰত বানক্ৰান্ত লোকসকল আশ্ৰয় গ্ৰহণ কৰি আছে । এই আশ্ৰয় শিবিৰৰ অধিকাংশই কৰিমগঞ্জ জিলাত আছে । কৰিমগঞ্জ জিলাত ১০৫ টা আশ্ৰয় শিবিৰত এতিয়াও বানক্ৰান্ত লোকসকলে আশ্ৰয় গ্ৰহণ কৰি আছে ।
লক্ষণীয় বিষয় যে, বান যোৱাৰ পিছত অৰ্থাৎ বানৰ শেষত ঠায়ে ঠায়ে বিভিন্ন সক্ৰামক ৰোগৰ প্ৰাদুৰ্ভাৱ হোৱা দেখা গৈছে । বহুত ঠাইত বানত ক্ষতিগ্ৰস্ত হৈছে বহু বাট-পথ, দলং আদি ৷ ফলত যাতায়ত ব্যৱস্থা ব্যাহত হৈ পৰিছে ।
লগতে পঢ়ক :বানত মুঠ ২৭ গৰাকী লোকৰ মৃত্যু; ১৩২৫ গাঁও ক্ষতিগ্ৰস্ত - ASSAM FLOOD 2024
