৩৭১ বছৰীয়া পৰম্পৰা ৰক্ষা কৰি আউনীআটী সত্ৰত বোকাখেল মাজুলী,১৪ এপ্ৰিল:আজি পহিলা ব'হাগ, মানুহৰ বিহু । ৰাজ্যজুৰি উদযাপন কৰা হৈছে মানুহ বিহু । ঢোল, পেঁপা-গগনা মাতত ৰজন জনাইছে আকাশ-বতাহ । মাজুলীৰ ঐতিহাসিক সত্ৰসমূহত সম্পূৰ্ণ ধৰ্মীয় পৰম্পৰাগত ৰীতি-নীতিৰে ব'হাগ বিহু উদযাপন কৰা হয় । ঢোল, পেঁপা, গগনা নহয় খোল, তাল, নাগাৰা, ডবা শংখ, বৰতালৰ শব্দৰে মুখৰিত হৈছে সত্ৰপীঠ মাজুলীত ।
মাজুলীৰ ঐতিহাসিক ৩৫ খন সত্ৰত ধৰ্মীৰ ৰীতি-নীতিৰে বিহু পালন হৈছে । পুৱাৰে পৰা মাজুলী বিহু উৎসৱৰ বাবে এক উখল-মাখল পৰিৱেশে বিৰাজ কৰিছে । হৰিনামৰ ধ্বনি, সমূহীয়া নাম, বৰগীত, দিহানাম আদিৰে মুখৰিত হৈ পৰিছে । মাজুলীৰ ঐতিহাসিক আউনীআটী সত্ৰত ৩৭১ বছৰীয়া পৰম্পৰাৰে বোকাখেল খেলে বৈষ্ণৱসকলে । চৰ্মৰোগ নিৰাময়ৰ বাবে বৈষ্ণৱসকলে বোকা লেপন কৰি শৰীৰত বোকাখেল খেলে ।
ভূমিক অতি পবিত্ৰ হিচাপে গণ্য কৰি ভকতসকলে ইজনে সিজনৰ শৰীৰত ভূমি লেপন কৰি বোকাখেলৰ আনন্দ উপভোগ কৰে । ঐতিহাসিক উত্তৰ কমলাবাৰী, নতুন কমলাবাৰী, ভোগপুৰ সত্ৰত পূৱাৰে নাম প্ৰসংগ গায়ন-বায়ন বিহাৰ নৃত্য কীৰ্তনীয়া, ওজাপালি পৰিৱেশন কৰা হৈছে । গুৰুসেৱা, নামসেৱা, ভকতসেৱা দৰে অন্যান্য পৰম্পৰাও পালন কৰা পৰিলক্ষিত হয় । ঐতিহাসিক আউনীআটী, দক্ষিনপাট সত্ৰত পূৱাৰে পৰা আধ্যাত্মিক পৰিবেশে বিৰাজ কৰিছে ।
উল্লেখ্য যে, ভকতসকলে সত্ৰাধিকাৰক সেৱা কৰি মালা দিয়া পৰম্পৰা বিগত ৫০০ বছৰে চলি আহিছে । আউনীআটী সত্ৰত সংকীৰ্ত্তন, দিহানাম, হিয়ানাম, ওজাপালি সংকীৰ্ত্তন, অপ্সৰা নৃত্য, গায়ন-বায়ন সবহুৱা নাম আদি দিনযোৰা কাৰ্যসুচীৰে প্ৰতিখন সত্ৰত উদযাপন কৰা হ'ব ৰঙালী বিহু । সত্ৰসমূহত ৫০০ বছৰীয়া আধ্যাত্মিক পৰম্পৰা নিভাঁজ ৰূপত পৰিৱেশন হৈছে ।
লগতে পঢ়ক:পৰম্পৰা ৰক্ষা কৰি টিংখাঙত গৰু বিহুৰ গধূলি নামঘৰৰ চোতালত চেমনীয়াৰ হুঁচৰি - Rangali Bihu 2024
