স্প’ৰ্টছ ডেস্ক, ৩ ছেপ্টেম্বৰ : আজি অসমৰ প্ৰথমগৰাকী অৰ্জুন বঁটা বিজয়ী খেলুৱৈ ভোগেশ্বৰ বৰুৱাৰ ওপজাদিন ৷ যাৰ বাবে প্ৰতিবছৰে এই বিশেষ দিনটোক পালন কৰা হয় অভিৰুচি ক্ৰীড়া দিৱস হিচাপে ৷ ১৯৩৭ চনৰ ৩ ছেপ্টেম্বৰত শিৱসাগৰৰ জয়সাগৰৰ সুন্দৰপুৰত জন্মগ্ৰহণ কৰিছিল অসমৰ প্ৰথমগৰাকী অৰ্জুন বঁটা প্ৰাপক ক্ৰীড়াবিদ ভোগেশ্বৰ বৰুৱাই ৷
অসমৰ প্ৰথমগৰাকী অৰ্জুন বঁটা বিজয়ীৰ শুভ জন্মদিন (ETV Bharat Assam)
ফুটবল খেলুৱৈৰূপে ক্ৰীড়া জীৱন আৰম্ভ কৰাৰ পাচত ১৯৬০ চনত ভাৰতীয় সেনা বাহিনীত যোগদান কৰা বৰুৱাই ১৯৬৪-১৯৬৫ চনৰ ৰাষ্ট্ৰীয় এথলেটিক প্ৰতিযোগিতাৰো আছিল স্বৰ্ণ বিজয়ী ৷ ১৯৬৬ চনৰ বেংককত পঞ্চম এছিয়ান গেমছত ৮০০ মিটাৰ দৌৰত স্বৰ্ণ পদক লাভ কৰি আন্তঃৰাষ্ট্ৰীয় পৰ্যায়ত স্বৰ্ণপদক প্ৰাপ্ত প্ৰথমগৰাকী অসমীয়াৰূপে পৰিগণিত হয় ভোগেশ্বৰ বৰুৱা ৷ একেটা বছৰতে (১৯৬৬ চনত) তেওঁক অৰ্জুন বঁটাৰে সন্মানিত কৰা হয় ।