স্প’ৰ্টছ ডেস্ক, 12 ছেপ্টেম্বৰ: প্ৰধানমন্ত্ৰী নৰেন্দ্ৰ মোদীয়ে বৃহস্পতিবাৰে ভাৰতৰ পেৰিছ পেৰালিম্পিকত অংশগ্ৰহণ কৰা খেলুৱৈসকলক তেওঁৰ বাসগৃহত সাক্ষাৎ কৰে ৷ সদ্যসমাপ্ত পেৰিছ গ্ৰীষ্মকালীন পেৰালিম্পিক গেমছত অভিলেখসংখ্যক 29 টা পদক জয় কৰাৰ বাবে দলটোক অভিনন্দন জনাই প্ৰধানমন্ত্ৰীগৰাকীয়ে ৷
ক্ৰীড়া মন্ত্ৰালয়ে শ্বেয়াৰ কৰা 43 ছেকেণ্ডৰ এটা ভিডিঅ’ত প্ৰধানমন্ত্ৰীক পেৰালিম্পিয়ান পদক বিজয়ীসকলক অভিনন্দন জনোৱা আৰু তেওঁলোকৰ সৈতে বাৰ্তালাপ কৰা দেখা যায় । ক্ৰীড়া মন্ত্ৰী মনসুখ মাণ্ডৱিয়া আৰু পেৰালিম্পিক কমিটী অৱ ইণ্ডিয়াৰ(পি চি আই) মুৰব্বী দেৱেন্দ্ৰ ঝাজহাৰিয়াও বাৰ্তালাপৰ সময়ত উপস্থিত আছিল ।
মহিলাৰ 10 মিটাৰ এয়াৰ ৰাইফল (এছ এইচ 1) প্ৰতিযোগিতাত ক্ৰমাগত দ্বিতীয়টো পেৰালিম্পিক স্বৰ্ণ জয় কৰা শ্বুটাৰ অৱনী লেখাৰা আৰু পেৰালিম্পিক পদক জয় কৰা ভাৰতৰ প্ৰথম জুডো খেলুৱৈ কপিল পাৰমাৰ প্ৰধানমন্ত্ৰীৰ সৈতে ফটোৰ বাবে প’জ দিয়াসকলৰ ভিতৰত আছিল অন্যতম ।