স্প’ৰ্টছ ডেস্ক, 30 ছেপ্টেম্বৰ: পদ্মশ্ৰী বঁটা প্ৰাপ্ত ভাৰতীয় তাৰকা ফুটবলাৰ বাইচুং ভুটিয়াই সোমবাৰে পুৱা শুভাৰম্ভ কৰে এক মাৰাথন কাৰ্যসূচীৰ ৷ তাৰকা ফুটবলাৰগৰাকীৰ সৈতে এই কাৰ্যসূচীত উপস্থিত আছিল অসমীয়া ছবিজগতৰ জনপ্ৰিয় অভিনেতা ৰবি শৰ্মা আৰু কণ্ঠশিল্পী দ্বীপলিনা ডেকা ৷ তেজপুৰৰ শ্বহীদ বাকৰিত অনুষ্ঠিত হৈছিল উক্ত অনুষ্ঠান ৷
উত্তৰ-পূৰ্বাঞ্চলৰ ৰাষ্ট্ৰীয় ঘাইপথ মন্ত্ৰালয়ৰ দ্বাৰা "স্বভাৱ স্বচ্ছতা সংস্কাৰ স্বচ্ছতা" শীৰ্ষক শ্লোগানেৰে তেজপুৰত সোমবাৰে অনুষ্ঠিত হয় এক মাৰাথন দৌৰৰ কাৰ্যসূচী ৷ স্বচ্ছ ভাৰত অভিযানৰ এক বিশেষ অংশ হিচাপে এই কাৰ্যসূচী অনুষ্ঠিত হয় ৷
সশস্ত্ৰ সীমা বলৰ সহযোগিতাত ৰাষ্ট্ৰীয় ঘাইপথ মন্ত্ৰালয়ে অনুষ্ঠিত কৰা এই মাৰাথনত অংশগ্ৰহণ কৰি ফুটবল তাৰকাগৰাকীয়ে কয় যে, "স্বচ্ছতা সকলোৰে প্ৰয়োজনীয়তা ৷ যুৱ প্ৰজন্মলৈ তেজপুৰৰ পৰা এটাই আহ্বান যাতে সু-স্বাস্থ্যৰ অধিকাৰী হৈ নিজৰ লগতে সকলোৱে পৰিষ্কাৰ-পৰিছন্ন হৈ থাকে" ৷