স্প’ৰ্টছ ডেস্ক: 22 নৱেম্বৰৰ পৰা আৰম্ভ হ’বলগীয়া ব’ৰ্ডাৰ-গাভাস্কাৰ ট্ৰফীৰ বাবে সাজু হৈছে ভাৰত । ভাৰতৰ হৈ ইনিংছ মুকলি কৰিবলগীয়া বেটছমেন যশস্বী জয়ছোৱাল সাম্প্ৰতিক সময়ত আছে সুন্দৰ ফৰ্মত ৷ যাৰ বাবে ক্ৰিকেটাৰগৰাকী 2024 চনত ভাৰতৰ হৈ টেষ্ট মেচত সৰ্বাধিক ৰাণ সংগ্ৰহকাৰীত পৰিণত হয় ।
জয়ছোৱাললৈ সমৰ্থন পূজাৰাৰ
জয়ছোৱালে বৰ্তমানলৈকে 11 খন মেচত 55.95 গড়ে সংগ্ৰহ কৰিছে 1119 ৰাণ । অনুৰাগীসকলে ক্ৰিকেটাৰগৰাকীৰ ধাৰাবাহিক উন্নত প্ৰদৰ্শনৰ বাবে উচ্চ প্ৰশংসা কৰিছে ৷ ভাৰতৰ অভিজ্ঞ বেটছমেন চেতেশ্বৰ পূজাৰাই জয়ছোৱালক সমৰ্থন কৰি কয় যে, তেওঁ ব’ৰ্ডাৰ-গাভাস্কাৰ ট্ৰফীত ডেভিদ ৱাৰ্ণাৰৰ ভূমিকা পালন কৰিব ।
22 নৱেম্বৰৰ পৰা অনুষ্ঠিত হ’বলগীয়া #ToughestRivalry ব’ৰ্ডাৰ-গাভাস্কাৰ ট্ৰফীৰ পূৰ্বে ইটিভি ভাৰতে সোধা এক প্ৰশ্নৰ উত্তৰত চেতেশ্বৰ পূজাৰাই কয় যে, "আচ্ছা, আপোনাৰ প্ৰথম প্ৰশ্নৰ উত্তৰ হৈছে যশস্বী (জয়ছোৱাল) ভাৰতৰ অন্যতম প্ৰতিভাশালী ক্ৰিকেটাৰ আৰু মই নিশ্চিত যে তেওঁ ভৱিষ্যতে ভাল প্ৰদৰ্শন কৰিব" ৷
অষ্ট্ৰেলিয়াৰ বিৰুদ্ধে যশস্বী জয়ছোৱালৰ গুৰুত্বপূৰ্ণ ভূমিকা
পূজাৰাই কয়, "মই জানো যে তেওঁৰ প্ৰমাণ কৰিবলৈ বহুত আছে ৷ বিশেষকৈ এগৰাকী অ’পেনাৰ হোৱাৰ বাবে তেওঁ এই শৃংখলাত গুৰুত্বপূৰ্ণ ভূমিকা পালন কৰিব ৷ যদি আমি (ভাৰতে) জিকিবলগা হয়, তেন্তে তেওঁৰ ভূমিকাই হ’ব আটাইতকৈ গুৰুত্বপূৰ্ণ" ৷
"তেওঁ এগৰাকী আক্ৰমণাত্মক খেলুৱৈ ৷ অষ্ট্ৰেলিয়াৰ দলৰ হৈ ডেভিদ ৱাৰ্ণাৰে পালন কৰাৰ দৰে একেই ভূমিকা পালন কৰিব পাৰে জয়ছোৱালে । তেওঁৰ বেটিং আমাৰ বাবে আৰু ভাৰতলৈ আগবঢ়োৱা অৱদানৰ বাবে অতি গুৰুত্বপূৰ্ণ বিবেচিত হ'ব ৷ যদিও আমি পৰাজিত হৈছিলো, তেওঁ কৰা ৰাণৰ বাবে আমি শক্তিশালী স্থিতিত আছিলো । এজন অ’পেনাৰ হোৱাৰ বাবে তেওঁ ভাৰতীয় বেটিং লাইনআপৰ বাবে এক গুৰুত্বপূৰ্ণ ভূমিকা পালন কৰে আৰু মই নিশ্চিত যে তেওঁ সফল হ'ব," বুলি লগতে পূজাৰাই উল্লেখ কৰে ৷
মানসিকভাৱে সবল জয়ছোৱাল
পূজাৰাই কয় যে, "তেওঁ মানসিকভাৱে শক্তিশালী ৷ তেওঁ সঁচাকৈয়ে ভালদৰে প্ৰস্তুতি কৰি বল কোবায় ৷ তেওঁ বেটিং কৰিবলৈ ভাল পায়, গতিকে মই ভাবো তেওঁ ভাৰতীয় দলৰ বাবে বহুদূৰ আগবাঢ়িব পাৰে ৷ কেৱল টেষ্ট নহয়, সকলো ফৰ্মেটতে তেওঁ সময়ৰ লগে লগে সফল হ'ব" ৷
ব’ৰ্ডাৰ-গাভাস্কাৰ ট্ৰফী 2024 জিকিবলৈ অষ্ট্ৰেলিয়া ফেভাৰিট
পূজাৰাই শৃংখলাটো জয়ী কৰাৰ ক্ষেত্ৰত পেট কামিন্স নেতৃত্বাধীন অষ্ট্ৰেলিয়াৰ দলটোক ফেভাৰিট হিচাপে আখ্যা দিয়ে ৷ "আৰু এই শৃংখলাটোৰ বাবে মোৰ ভৱিষ্যতবাণী, সঁচাকৈ ক'বলৈ গ'লে অষ্ট্ৰেলিয়াৰ পক্ষত আছে, ইয়াত কোনো সন্দেহ নাই ৷ কিন্তু প্ৰশ্নটো হ'ল আমি শৃংখলাটো জিকিব পাৰিম নেকি ? হয়, নিশ্চিতভাৱে আমি জিকিব পাৰো ৷ ইয়াত কোনো সন্দেহ নাই ৷ কিন্তু যদি মই ভৱিষ্যতবাণী কৰিবলগা হয়, তেন্তে এই শৃংখলাটো জিকাৰ ক্ষেত্ৰত অষ্ট্ৰেলিয়া প্ৰিয়," তেওঁ কয় ।
লগতে পঢ়ক:ভাৰত বনাম অষ্ট্ৰেলিয়া; পাৰ্থত খলনায়কৰ ভূমিকা ল’ব নেকি বতৰে ?
