নিউজ ডেস্ক, ২৩ এপ্ৰিল: লক্ষ্ণৌ ছুপাৰ জায়েন্টছে একেৰাহে দ্বিতীয়খন খেলত চেন্নাই ছুপাৰ কিংছক পৰাস্ত কৰিছে । লক্ষ্ণৌৱে নিজৰ ঘৰুৱা খেলপথাৰ একনাত চেন্নাইক ৮ উইকেটত পৰাস্ত কৰাৰ পাছত পুনৰ চেপাউকত ৬ উইকেটত পৰাস্ত কৰে । চেন্নাইয়ে প্ৰথমে বেটিং কৰি ৪ উইকেটত ২১০ ৰান সংগ্ৰহ কৰে । চেন্নাইৰ হৈ ১০৮ ৰানৰ অপৰাজিত ইনিংছ খেলিছিল ঋতুৰাজ গাইকোৱাদে । প্ৰত্যুত্তৰত লক্ষ্ণৌৱে ১৯.৩ অভাৰত ৪টা উইকেট হেৰুৱাই লক্ষ্যত উপনীত হয় । মাৰ্কাছ ষ্টয়নিছে ৬৩টা বলত ১২৪ ৰান সংগ্ৰহ কৰি অপৰাজিত হৈ থাকে ।
এই জয়েৰে লক্ষ্ণৌ দলে পইণ্ট তালিকাত চতুৰ্থ স্থান দখল কৰে । আনহাতে পঞ্চম স্থানলৈ অৱনমিত হয় চেন্নাই । চেন্নাইয়ে পৰৱৰ্তী মেচ ২৮ এপ্ৰিলত ছানৰাইজাৰ্ছ হায়দৰাবাদৰ বিৰুদ্ধে খেলিব, আনহাতে লক্ষ্ণৌৱে ২৭ এপ্ৰিলত একনাত ৰাজস্থান ৰয়েলছৰ বিৰুদ্ধে অৱৰ্তীণ হ’ব । চেন্নাইৰ এম এ চিদাম্বৰম ষ্টেডিয়ামত লক্ষ্ণৌ ছুপাৰ জায়েন্টছ আৰু চেন্নাই ছুপাৰ কিংছৰ মাজত মঙলবাৰে অনুষ্ঠিত হয় আই পি এল ২০২৪ ৰ ৩৯ সংখ্যক মেচখন ।
এই খেলখত টছত জিকি প্ৰথমে বলিঙৰ সিদ্ধান্ত গ্ৰহণ কৰে লক্ষ্ণৌৰ অধিনায়ক কে এল ৰাহুলে । বেটিং কৰিবলৈ আহি চেন্নাই দলে মাত্ৰ ৪ ৰাণতে আজিংক্য ৰাহানেৰ উইকেট হেৰুৱায় । তাৰ পিচতে দলৰ স্ক'ৰ ৪৯ হৈ থকা সময়তে ১১ ৰাণ কৰি ডেৰীল মিচেলো পেভিলিয়নলৈ ওভতে । কিন্তু অধিনায়ক তথা অপেনাৰ ৰুতুৰাজ গাইকোৱাড আৰু ৰবীন্দ্ৰ জাদেজাই দলৰ স্ক'ৰ আগুৱাই নিয়ে । ১৬ ৰাণ কৰি জাদেজা আউট হোৱাৰ পিচত খেলপথাৰত নামে শিৱম দুবে ।