স্প’ৰ্টছ ডেস্ক, 22 আগষ্ট: বুধবাৰে মুম্বাইত অনুষ্ঠিত হয় চিয়েট বাৰ্ষিক ক্ৰিকেট বঁটা প্ৰদান অনুষ্ঠান ৷ য’ত ভাৰতৰ প্ৰাক্তন মুখ্য প্ৰশিক্ষক ৰাহুল দ্ৰাবিড়ক প্ৰদান কৰা হয় "লাইফটাইম এচিভমেণ্ট এৱাৰ্ড" ৷ আনহাতে ভাৰতৰ অধিনায়ক ৰোহিত শৰ্মাক "পুৰুষৰ শাখাত বছৰটোৰ আন্তঃৰাষ্ট্ৰীয় ক্ৰিকেটাৰ" ৰ বঁটা প্ৰদানৰ লগতে প্ৰাক্তন অধিনায়ক বিৰাট কোহলীক "বছৰটোৰ(পুৰুষ) এদিনীয়া বেটছমেন" শীৰ্ষক বঁটা প্ৰদান কৰা হয় ।
অৱশ্যে, ভাৰতীয় ক্ৰিকেট দলৰ অন্যতম সদস্য শ্ৰেয়ছ আয়াৰে আন এক কাৰণৰ বাবেহে অনুষ্ঠানটোত উপস্থিত থকা সকলোৰে হৃদয় জয় কৰিবলৈ সক্ষম হৈছিল ।
আয়াৰ-ৰোহিতৰ বিশেষ ভিডিঅ’ ভাইৰেল
এই বঁটা প্ৰদান অনুষ্ঠানৰ এক বিশেষ মুহূৰ্তৰ ভিডিঅ’ ইতিমধ্যে ভাইৰেল হৈ পৰিছে সামাজিক মাধ্যমত ৷ যি ভিডিঅ’ই লাখ লাখ ক্ৰিকেটপ্ৰেমীৰ হৃদয় জয় কৰিবলৈ সক্ষম হৈছে ৷ ভিডিঅ’টোত দেখা পোৱা অনুসৰি, পূৰ্বৰে পৰা অনুষ্ঠিত উপস্থিত থকা ভাৰতীয় ক্ৰিকেট দলৰ অন্যতম সদস্য শ্ৰেয়ছ আয়াৰে অধিনায়ক ৰোহিত শৰ্মা উপস্থিত হোৱাৰ লগে লগে নিজৰ আসনখন এৰি বহিবলৈ অনুৰোধ জনায় ৷ আয়াৰৰ এই ভংগিমা ৰোহিত শৰ্মাই হাঁহিমুখে গ্ৰহণ কৰে যদিও আয়াৰৰ সন্মুখতে থকা নিজৰ আসনখনত বহে ভাৰতৰ অধিনায়কগৰাকী ৷
সামাজিক মাধ্যমত উচ্চ প্ৰশংসা
এই বিশেষ মুহূৰ্তৰ ভিডিঅ’টো সামাজিক মাধ্যমত ভাইৰেল হোৱাৰ লগে লগে নেটিজেনসকলে প্ৰশংসাৰে উপচাই পেলাই আয়াৰক ৷ এজন ছ’চিয়েল মিডিয়া ব্যৱহাৰকাৰীয়ে লিখিছিল, "ৰোহিত শৰ্মা আৰু শ্ৰেয়ছ আয়াৰৰ খেলপথাৰত আৰু বাহিৰত এক সুন্দৰ বন্ধুত্বমূলক সম্পৰ্ক আছে । তেওঁলোকৰ বন্ধুত্বই দলটোলৈ ইতিবাচকতা আনিছে আৰু এয়া দেখা পোৱাতো সদায় আনন্দদায়ক" ৷
আন এজনে এইদৰে লিখিছিল, "ইয়াৰ শীৰ্ষত আছে ব্ৰাদাৰহুড(ভাতৃত্ব) । যুৱ আৰু জ্যেষ্ঠ খেলুৱৈসকলৰ সৈতে ৰোহিত শৰ্মাৰ সম্পৰ্ক বহুত ভাল" ।
আয়াৰৰ "আউটষ্টেণ্ডিং লিডাৰশ্বিপ" বঁটা লাভ
শ্ৰেয়ছ আয়াৰে চিয়েট বঁটা প্ৰদান অনুষ্ঠানত লাভ কৰে ষ্টাৰ স্প’ৰ্টছ টি-20 নেতৃত্ব বঁটা ৷ ইয়াৰ লগে লগে আই পি এলৰ ফাইনেলত দুটাকৈ দলক নেতৃত্ব দিয়া প্ৰথমগৰাকী অধিনায়কত পৰিণত হয় ক্ৰিকেটাৰগৰাকী ।
সোঁহতীয়া বেটছমেনজনে এই বছৰৰ আৰম্ভণিতে কলকাতা নাইট ৰাইডাৰ্ছক দলটোৰ তৃতীয়টো আই পি এল খিতাপ অৰ্জন কৰাত সহায় কৰিছিল ৷ তেওঁ আই পি এলৰ 17 বছৰত প্ৰথমগৰাকী অধিনায়কত পৰিণত হয়, যিয়ে দুটা পৃথক দলক ফাইনেলত উপনীত কৰাত সহায় কৰে ৷ কলকাতা নাইট ৰাইডাৰ্ছৰ পূৰ্বে আয়াৰে 2020 চনত দিল্লী কেপিটেলছক আই পি এল সংস্কৰণৰ ফাইনেলত উপনীত কৰাত সহায় কৰিছিল ৷
লগতে পঢ়ক:তিনি স্তম্ভৰ বাবেই সম্ভৱ হ’ল বিশ্বকাপৰ খিতাপ: কাৰ কথা ক’লে ৰোহিত শৰ্মাই - 3 PILLARS OF INDIAN CRICKET TEAM
