নিউজ ডেস্ক, 6 জুন: এইবাৰৰ লোকসভা নিৰ্বাচনত বিজয় সাব্যস্ত কৰিছে কাৰাবন্দী দুই নেতাই ৷ অষ্টাদশ লোকসভা গঠনৰ প্ৰাকমূহুৰ্তত কাৰাবন্দী প্ৰাৰ্থী দুগৰাকীৰ অধিকাৰৰ ওপৰত কেইবাটাও প্ৰশ্ন উত্থাপিত হৈছে ৷ শপতগ্ৰহণৰ অনুষ্ঠানৰ পৰা আঁতৰি থাকিব লাগিলেও কিন্তু দুয়োগৰাকী প্ৰাৰ্থীৰে সাংসদ হিচাপে শপত গ্ৰহণ লোৱাৰ সাংবিধানিক অধিকাৰ আছে ৷
মঙলবাৰে নিৰ্বাচন আয়োগে ঘোষণা কৰা ফলাফল অনুসৰি, কাৰাবন্দী নেতা তথা শিখ প্ৰচাৰক অমৃতপাল সিঙে খাদুৰ চাহিব আসনৰ পৰা জয় লাভ কৰে ৷ আনহাতে, আন এগৰাকী কাৰাবন্দী শ্বেখ আব্দুল ৰছিদে বাৰামুলা সমষ্টিৰ পৰা বিজয়ী হয় । ৰছিদক জনপ্ৰিয়ভাৱে অভিযন্তা ৰছিদ বুলিও জনা যায় ৷
লগতে পঢ়ক:কাৰাগাৰৰ পৰাই নিৰ্বাচনত প্ৰতিদ্বন্দ্বিতা : বৃহৎ অগ্ৰগতি অমৃতপাল সিঙৰ - Lok Sabha Election Results 2024
উল্লেখ্য যে, শ্বেখ আব্দুল ৰছিদে সন্ত্ৰাসবাদীক অৰ্থ যোগান ধৰাৰ অভিযোগত 2019 চনৰ 9 আগষ্টৰ পৰা তিহাৰ কাৰাগাৰত বন্দী হৈ আছে ৷ বিপৰীতে ৰাষ্ট্ৰীয় সুৰক্ষা আইনৰ অধীনত গোচৰ ৰুজু কৰি ডিব্ৰুগড়ৰ কাৰাগাৰলৈ প্ৰেৰণ কৰা হৈছিল অমৃতপাল সিঙক ৷
ফলাফল ঘোষণাৰ পিছত প্ৰশ্ন উত্থাপিত হৈছে যে, এই কাৰাবন্দী নেতাসকলে সাংসদ হিচাপে শপত গ্ৰহণ কৰিব পাৰিবনে ? যদিহে পাৰে, তেন্তে কেনেদৰে এয়া সম্ভৱ ?
ইয়াৰ সৈতে জড়িত প্ৰতিটো কথা ব্যাখ্যা কৰি সংবিধান বিশেষজ্ঞ আৰু লোকসভাৰ প্ৰাক্তন মহাসচিব পি ডি টি আচাৰীয়ে এনেক্ষেত্ৰত সাংবিধানিক ব্যৱস্থাসমূহ অনুসৰণ কৰাৰ ওপৰত গুৰুত্ব আৰোপ কৰে । সংসদৰ সদস্য হিচাপে শপত গ্ৰহণ কৰাটো এক সাংবিধানিক অধিকাৰ বুলি আচাৰীয়ে ব্যক্ত কৰে ৷
লগতে পঢ়ক:ডিব্ৰুগড়ৰ কাৰাগাৰৰ পৰাই নিৰ্বাচনত প্ৰতিদ্বন্দ্বিতা কৰিব অমৃতপাল সিঙে - Lok Sabha Election 2024
যিহেতু দুয়োগৰাকী নেতা বৰ্তমান কাৰাগাৰত আছে, তেনেক্ষেত্ৰত শপত গ্ৰহণৰ অনুষ্ঠানত অংশগ্ৰহণ কৰিবলৈ তেওঁলোকে অনুমতি লাভ কৰিব লাগিব ৷ তেওঁলোকে শপত লোৱাৰ পিছত পুনৰ ঘূৰি কাৰাগাৰলৈ আহিব লাগিব ৷
এই প্ৰক্ৰিয়াৰ সৈতে জড়িত কথাসমূহ স্পষ্ট কৰিবলৈ আচাৰীয়ে সংবিধানৰ 101 (4) নং অনুচ্ছেদৰ উদ্ধৃতি দিয়ে ৷ য'ত অধ্যক্ষৰ আগতীয়া অনুমোদন অবিহনে সংসদৰ দুয়োখন সদনৰ সদস্যৰ অনুপস্থিতিৰ বিষয়ে লিপিবদ্ধ কৰা আছে ৷
লগতে পঢ়ক:মোদীৰ তৃতীয়টো কাৰ্যকালৰ শপত গ্ৰহণ অনুষ্ঠানত উপস্থিত থাকিব কেইবাগৰাকীও ৰাষ্ট্ৰনেতা - Lok Sabha Election Results 2024
তেওঁ কয় যে, কাৰাবন্দী নেতা দুগৰাকীয়ে শপত গ্ৰহণ কৰাৰ পিছত তেওঁলোকে অধ্যক্ষক সদনত উপস্থিত থাকিবলৈ অপাৰগ হোৱাৰ বিষয়ে অৱগত কৰি পত্ৰ লিখিব লাগিব । অধ্যক্ষই তেতিয়া তেওঁলোকৰ অনুৰোধ দৰ্শাই দাখিল কৰা পত্ৰসমূহ সদস্যৰ অনুপস্থিতিৰ সন্দৰ্ভত গঠিত সদনৰ সমিতিলৈ প্ৰেৰণ কৰিব ।
সমিতিয়ে তেতিয়া পৰামৰ্শ দিব যে, সদস্যজনক সদনৰ কাৰ্যবিধিত উপস্থিত থাকিবলৈ দিয়া উচিত নে নহয় । তাৰপিছত এই মতামতকে প্ৰসংগটোৰ ভোট হিচাপে অধ্যক্ষই গ্ৰহণ কৰিব ৷
লগতে পঢ়ক:এন ডি এৰ জয়তো পৰাজয়ৰ অনুভৱ; '400 পাৰ'ৰ পৰা বিজেপিৰ কেনেদৰে 32 বিয়োগ হ'ল ? - Lok Sabha Election Results 2024
যদি ৰছিদ বা সিঙক দোষী সাব্যস্ত কৰিবলগা হয় আৰু তেওঁলোকে কমেও দুবছৰৰ বাবে কাৰাবাস খাটিব লগা হয়, তেন্তে তেওঁলোকে 2013 চনৰ উচ্চতম ন্যায়ালয়ৰ ৰায় অনুসৰি তৎক্ষণাত কাৰ্যকৰী হোৱাকৈ লোকসভাত তেওঁলোকৰ আসনখন হেৰুৱাব ৷ য'ত সাংসদ আৰু বিধায়কসকলক এনেক্ষেত্ৰত অযোগ্য ঘোষণা কৰা হ'ব ৷
এই সিদ্ধান্তই জনপ্ৰতিনিধিত্ব আইনৰ ধাৰা 8(4) ৰ বাতিল কৰে ৷ যিয়ে আগতে দোষী সাব্যস্ত সাংসদ আৰু বিধায়কসকলক তেওঁলোকৰ দোষী সাব্যস্ত হোৱাৰ বিৰুদ্ধে আপীল কৰিবলৈ তিনি মাহ সময়ৰ অনুমতি প্ৰদান কৰিছিল ।
লগতে পঢ়ক:ৰাহুল গান্ধীৰ দুটাকৈ দেশজোৰা যাত্ৰাই নিৰ্বাচনত কিদৰে সহায় কৰিলে কংগ্ৰেছক ? - Lok Sabha Election Results 2024