গুৱাহাটী: গুৱাহাটীৰ গড়চুকত ওলাইছে কাঁহী, বাটি, ঘটি, লোটা আদি । অলপ নহয় ৷ বস্তাই বস্তাই ওলাইছে ৷ গড়চুকৰ লাচিতগঁড় হাইস্কুলৰ সমীপত থকা এটা ডেম্পত বস্তাই বস্তাই ওলাইছে এই সামগ্ৰীসমূহ ।
গড়চুক আৰক্ষীয়ে শনিবাৰে চলোৱা এক অভিযানৰ সময়ত এই সামগ্ৰীসমূহ ডেম্পটোৰ পৰা উদ্ধাৰ কৰা হয় ৷ ঘটনা সন্দৰ্ভত ইতিমধ্যে দুজন লোকক গ্ৰেপ্তাৰো কৰা হৈছে বুলি গড়চুক আৰক্ষী থানাৰ এজন বিষয়াই জানিবলৈ দিয়ে ৷
গড়চুক আৰক্ষী থানাৰ বিষয়াগৰাকীয়ে কয়, "এক গোপন সূত্ৰৰ পম খেদি গড়চুকৰ লাচিতগঁড় হাইস্কুলৰ সমীপত থকা এইছ কে ট্ৰেডিং এজেন্সী নামৰ ডেম্প এটাত এই অভিযান চলাও ৷ মহানগৰীৰ বিভিন্ন ধৰ্মীয় অনুষ্ঠানৰ পৰা চুৰি হোৱা সামগ্ৰীবোৰ এইচ কে ট্ৰেডিং এজেন্সী নামৰ ডেম্পটোত থকা বুলি গোপন সূত্ৰৰ পৰা এটা খবৰ পাইছিলো । এই গোপন সূত্ৰৰ ভিত্তিত ডেম্পটোত অভিযান চলাই বৃহৎ পৰিমাণৰ কাঁহ, পিতল, তামৰ সামগ্ৰী জব্দ কৰা হৈছে । মহানগৰীৰ ধৰ্মীয় অনুষ্ঠান মন্দিৰ আৰু মছজিদৰ পৰা চুৰি কৰা সামগ্ৰী উদ্ধাৰ কৰা হয় ডেম্পটোৰ পৰা ।"
আৰক্ষী বিষয়াগৰাকীয়ে লগতে কয়, "কাঁহ আৰু পিতলৰ ঘটি ২৩২ টা, কাঁহৰ কাঁহী ৯৭ খন, ধূপদানী ৬৮ টা, মন্দিৰৰ ঘণ্টা ১ টা, কব্জা ১৮ টা, চিৎকানী ১৮ টা, কাঁহৰ বাটি ৩ টা, বিদ্যুৎ পৰিবাহী তাঁৰ ৯ বস্তা, এলুমিনিয়ামৰ ভাল্ব ৪ টা আৰু বেটাৰী ১৪ টা জব্দ কৰা হৈছে । ডেম্পৰ পৰা শ্বাহানুৰ ইছলাম (১৮) আৰু প্ৰেম বাহাদুৰ মগৰ (২৮) নামৰ দুজনক গ্ৰেপ্তাৰ কৰা হৈছে । প্ৰেম বাহাদুৰ মগৰৰ ঘৰ ধেমাজিত বুলি জানিব পৰা হৈছে ৷"
