ধিঙত বদৰুদ্দিন আজমলৰ বিশাল জনসভা
নগাঁও, 3 ফেব্ৰুৱাৰী:চমু চাপিছে লোকসভা নিৰ্বাচনৰ দিন ৷ বাকী ৰাজনৈতিক দলসমূহৰ দৰে এ আই ইউ ডি এফো ব্যস্ত হৈ পৰিছে ভোটাৰক আকৰ্ষণ কৰাৰ বাবে ৷ শনিবাৰে নগাঁও লোকসভা সমষ্টিত পুনৰ নিৰ্বাচনী ৰণডংকা বজালে এ আই ইউ ডি এফ প্ৰধান বদৰুদ্দিন অজমলে ।
নগাঁৱৰ ধিং বিধানসভা সমষ্টিৰ অন্তৰ্গত ৰাজাবাৰী খেল পথাৰত অনুষ্ঠিত হোৱা এ আই ইউ ডি এফৰ যুৱ মৰ্চাৰ যুৱ সমাৰোহত অংশগ্ৰহণ কৰি নিৰ্বাচনী ৰণশিঙা বজায় বদৰুদ্দিন অজমলে । সহস্ৰাধিক লোকৰ উপস্থিতিত অনুষ্ঠিত হোৱা এ আই ইউ ডি এফৰ সভাত ভাষণ প্ৰসংগত শাসকীয় বিজেপিৰ লগতে বিৰোধী কংগ্ৰেছকো সমালোচনা কৰে সাংসদ বদৰুদ্দিন আজমলে । ধিং সমষ্টিত অনুষ্ঠিত হোৱা বিশাল সমাৰোহখনত উপস্থিত থাকি বিশেষকৈ কংগ্ৰেছৰ বিৰুদ্ধে আক্ৰমনাত্মক হৈ পৰে দলটোৰ নগাঁও লোকসভা সমষ্টিৰ সাম্ভাব্য প্ৰাৰ্থী তথা বিধায়ক আমিনুল ইছলাম ।