ডিব্ৰুগড়/তিনিচুকীয়া, 19 মাৰ্চ :নিৰ্বাচনৰ দিন ঘোষণাৰ পাচতে তৎপৰতাৰে নিৰ্বাচনী প্ৰচাৰ আৰম্ভ কৰিছে শাসক-বিৰোধীকে ধৰি প্ৰতিটো ৰাজনৈতিক দলে ৷ অসম জাতীয় পৰিষদৰ সভাপতি তথা ডিব্ৰুগড় লোকসভা সমষ্টিৰ বিৰোধী ঐক্য মঞ্চৰ মনোনীত প্ৰাৰ্থী লুৰীণজ্যোতি গগৈয়েও আৰম্ভ কৰিছে নিৰ্বাচনী প্ৰচাৰ ৷
দেওবাৰে তিনিচুকীয়া জিলাৰ মাৰ্ঘেৰিটাত আনুষ্ঠানিকভাৱে নিৰ্বাচনী প্ৰচাৰ চলাই অসম জাতীয় পৰিষদৰ সভাপতি তথা ডিব্ৰুগড় লোকসভা সমষ্টিৰ পৰা বিৰোধী ঐক্য মঞ্চৰ দ্বাৰা মনোনীত প্ৰাৰ্থীগৰাকীয়ে ৷ লুৰীণজ্যোতি গগৈয়ে দেওবাৰৰ আবেলি এখন নিৰ্বাচনী প্ৰচাৰ সভাত অংশগ্ৰহণ কৰি বিজেপি দলৰ প্ৰাৰ্থী তথা তেওঁৰ প্ৰতিদ্বন্দ্বী সৰ্বানন্দ সোণোৱালৰ বিৰুদ্ধে সমালোচনাত সোচ্চাৰ হৈ পৰে । বিজেপিৰ নেতৃত্বাধীন চৰকাৰখনক ফেচিষ্ট আৰু গণতন্ত্ৰ বিৰোধী আখ্যা দিয়ে গগৈয়ে ।
এই সভাত বিৰোধী ঐক্য মঞ্চৰ দ্বাৰা প্ৰক্ষেপিত প্ৰাৰ্থীগৰাকীৰ লগত উপস্থিত থাকে জ্যেষ্ঠ কংগ্ৰেছ নেতা পৱন সিং ঘাটোৱাৰ ৷ ডিব্ৰুগড়ত শনিবাৰৰ নিশা বিজেপি নেতা তথা ডিব্ৰুগড় লোকসভা সমষ্টিৰ পৰা মনোনীত প্ৰাৰ্থী সৰ্বানন্দ সোণোৱালৰ কাষত এক অনুষ্ঠানত তথা প্ৰাক্তন মুখ্যমন্ত্ৰীগৰাকী নিৰ্বাচনত জয়ী হ’বই বুলি সংবাদ মাধ্যমৰ আগত দাবী কৰিছিল প্ৰাক্তন কেন্দ্ৰীয় মন্ত্ৰী তথা জ্যেষ্ঠ কংগ্ৰেছী নেতা পৱন সিং ঘাটোৱাৰে ৷ সোমবাৰে এই সন্দৰ্ভত সংবাদ মাধ্যমৰ প্ৰশ্নৰ উত্তৰ দিয়ে ঘাটোৱাৰে ৷