নিউজ ডেস্ক, ১৪ জুলাই : দেওবাৰে কংগ্ৰেছ দলে ঘোষণা কৰে লোকসভাত কংগ্ৰেছৰ উপ-দলপতিৰ নাম ৷ সাংসদ গৌৰৱ গগৈক উপ-দলপতি হিচাপে মনোনীত কৰা হয় ৷ তদুপৰি সাংসদ কে সুৰেশক লোকসভাত মুখ্য হুইপ হিচাপে মনোনীত কৰে কংগ্ৰেছে ৷ আনহাতে সাংসদ মণিকম ঠাকুৰ আৰু মোঃ জাৱাইদে দলৰ হুইপ হিচাপে কাম কৰিব ৷
ইয়াৰ পিচতে সাংসদ গগৈয়ে এক্সৰ জৰিয়তে কংগ্ৰেছ নেত্ৰীৰ প্ৰতি কৃতজ্ঞতা জ্ঞাপন কৰে ৷ তেওঁৰ ওপৰত দলৰ নেতৃত্বই আস্থা ৰাখি এই দায়িত্ব অৰ্পণ কৰাৰ বাবে কৃতজ্ঞ সাংসদগৰাকী ৷ উল্লেখ্য যে কংগ্ৰেছ নেত্ৰী ছোনিয়া গান্ধীয়ে লোকসভাৰ অধ্যক্ষ ওম বিৰলালৈ এখন আনুষ্ঠানিক পত্ৰ প্ৰেৰণ কৰে ৷ কংগ্ৰেছ সাংসদ কে চি বেণুগোপালে ‘এক্স’ৰ জৰিয়তে এই নতুন নিযুক্তিৰ সন্দৰ্ভত এক পোষ্ট কৰে ৷
কে চি বেণুগোপালে এক্সত লিখে, ‘‘ কংগ্ৰেছ সংসদীয় দলৰ অধ্যক্ষ শ্ৰীমতী ছোনিয়া গান্ধীয়ে মাননীয় লোকসভা অধ্যক্ষলৈ পত্ৰ লিখি লোকসভাত কংগ্ৰেছ দলৰ বাবে উপ-নেতা, মুখ্য হুইপ আৰু দুজন হুইপৰ নিযুক্তিৰ বিষয়ে অৱগত কৰোৱাইছে ৷ উপ-নেতা গৌৰৱ গগৈ, মুখ্য হুইপ কে সুৰেশ, হুইপ মণিকম ঠাকুৰ আৰু মোঃ জাৱাইদ ৷ নতুনকৈ নিযুক্তি লাভ কৰাসকলক অভিনন্দন ৷’’