গোৱালপাৰা, 11 মাৰ্চ: সমাগত লোকসভা নিৰ্বাচন । নিৰ্বাচনক লৈ সাজু শাসক-বিৰোধীকে ধৰি ৰাজ্যৰ প্ৰতিটো ৰাজনৈতিক দল । লোকসভা নিৰ্বাচনক লক্ষ্য কৰি তৎপৰতাৰে নিৰ্বাচনী প্ৰচাৰ চলোৱা পৰিলক্ষিত হৈছে প্ৰতিটো ৰাজনৈতিক দলে । সোমবাৰে গোৱালপাৰা জিলাৰ জলেশ্বৰ সমষ্টিৰ অন্তৰ্গত শিমলাবাৰীত অনুষ্ঠিত হয় এআইইউডিএফ দলৰ এক বিশাল জনসভা ৷
এই সভাত কেবাটাও বিস্ফোৰক মন্তব্য আগবঢ়ায় দলটোৰ বিধায়ক হাফিজ ৰফিকুল ইছলামে । ৰফিকুল ইছলামে বিজেপি দলক সাম্প্ৰদায়িক দল বুলি অভিহিত কৰি কয়, "এই দল ভাৰতীয় সংবিধানৰ দুশমন । ভাৰতবৰ্ষৰ বিভিন্ন জাতি-জনগোষ্ঠীৰ মাজত থকা শান্তি-সম্প্ৰীতি বিনষ্ট কৰিছে বিজেপি দলে । এয়া আমি কোৱা কথা নহয় ।"
সভাখনত এ আই ইউ ডি এফ দলৰ জনীয়াৰ বিধায়কগৰাকীয়ে বিৰোধী কংগ্ৰেছক লক্ষ্য কৰিও আক্ৰমণাত্মক বক্তব্য আগবঢ়াই কয়, "1983 চনৰ নেলীৰ গণ হত্যা, কোকৰাঝাৰৰ বি টি এ ডি আদিত সংঘটিত হোৱা গোষ্ঠী সংঘৰ্ষ কংগ্ৰেছৰ আমোলত হৈছিল । নামনি অসমৰ এই বৃহৎ গোষ্ঠী সংঘৰ্ষৰ সময়ত ৰকিবুল হুছেইন কেবিনেট মন্ত্ৰী হিচাপে তৰুণ গগৈৰ সোঁহাত স্বৰূপ আছিল । কিন্তু গোষ্ঠী সংঘৰ্ষৰ সময়ত ৰকিবুল হুছেইন শীত-তাপ নিয়ন্ত্ৰিত কোঠাত বহি চিকেন তন্দুৰী খোৱাত ব্যস্ত আছিল ৷"