মৰাণ,৮ এপ্ৰিল :লোকসভা নিৰ্বাচনৰ দিন চমু চাপিছে আৰু ইয়াৰ লগে লগে শাসকীয় বিজেপিৰ প্ৰচাৰো তুংগত উঠিছে । প্ৰতিদিনে ৰাজ্যৰ বিভিন্ন প্ৰান্তত ইখনৰ পিচত সিখন নিৰ্বাচনী প্ৰচাৰ সভাত অংশ লৈছে মুখ্যমন্ত্ৰী ড৹ হিমন্ত বিশ্ব শৰ্মাই । ইয়াৰ মাজতে সোমবাৰে যোৰহাট লোকসভা সমষ্টিত বিজেপি প্ৰাৰ্থী তপন কুমাৰ গগৈৰ হৈ নিৰ্বাচনী সভাত মুখ্যমন্ত্ৰীগৰাকীয়ে অংশগ্ৰহণ কৰে ।
চৰাইদেউৰ সাপেখাতীত ৰাইজৰ সৈতে নাচি-বাগি বিজেপিৰ বিজয় সংকল্প সমাৱেশত অংশগ্ৰহণ কৰে মুখ্যমন্ত্ৰীগৰাকীয়ে । এই সভাত মুখ্যমন্ত্ৰীগৰাকীয়ে বিজেপি চৰকাৰৰ অৰুণোদয়, লাখপতি বাইদেউ আদিৰ দৰে বিভিন্ন আঁচনিৰ প্ৰশংসা কৰে আৰু বিজেপি চৰকাৰৰ সফলতাৰ কথাও ৰাইজক অৱগত কৰে । লগতে অমৃত বৃক্ষ আন্দোলন , খেল মহাৰণ, সাংস্কৃতিক মহাসংগ্ৰাম, লাচিত বৰফুকনৰ ৪০০ বছৰীয়া জন্মজয়ন্তী পালন কৰাৰ লগতে চৰাইদেউ মৈদাম ক্ষেত্ৰক বিশ্ব ঐতিহ্য ক্ষেত্ৰলৈ উন্নীত কৰা আদি উন্নয়নৰ খতিয়ানো দাঙি ধৰে ।
চৰাইদেউৰ সাপেখাতী উচ্চতৰ মাধ্যমিক বিদ্যালয়ৰ খেলপথাৰ প্ৰাঙ্গণত অনুষ্ঠিত বিজেপিৰ এই বিজয় সংকল্প সমাৱেশত মুখ্যমন্ত্ৰীগৰাকীৰ সৈতে উপস্থিত থাকে সাংসদ পল্লৱ লোচন দাস, মন্ত্ৰী যোগেন মহন, বিধায়ক ধৰ্মেশ্বৰ কোঁৱৰ, প্ৰাক্তন বিধায়িকা নৱনীতা সন্দিকৈৰ লগত চৰাইদেউ জিলা বিজেপিৰ শীৰ্ষ নেতাসকল ।