হিমন্ত বিশ্ব শৰ্মাৰ অহংকাৰৰ পতন ঘটিছে: অখিল গগৈ - Lok Sabha Election Results 2024

সাম্প্ৰদায়িকতাৰ বিৰুদ্ধে ৰাইজে ৰায় দিলে । বিজেপি নেতাৰ অহংকাৰৰ পতন ঘটিছে বুলি সংবাদমেল সম্বোধন কৰি বিজেপিক তীব্ৰ সমালোচনা কৰে অখিল গগৈয়ে ।

শিৱসাগৰ,৫ জুন: "এই নিৰ্বাচনত বিজেপিৰ সাম্প্ৰদায়িকতা আৰু দাদাগিৰিৰ পৰাজয় হৈছে । হিমন্ত বিশ্ব শৰ্মাৰ অহংকাৰৰ পতন ঘটিছে ।" এই মন্তব্য অখিল গগৈৰ । মঙলবাৰে ঘোষণা হোৱা ফলাফল সন্দৰ্ভত প্ৰতিক্ৰিয়া প্ৰকাশ কৰি সংবাদমেল সম্বোধন কৰি বিজেপিক তীব্ৰ সমালোচনা কৰে শিৱসাগৰৰ বিধায়ক অখিল গগৈয়ে । বিজেপিক সমালোচনা কৰি গগৈয়ে কয়, "কালিৰ নিৰ্বাচনী ফলাফলটো বিজেপিৰ সাম্প্ৰদায়িকতাবাদৰ, ফেচিবাদৰ বিৰুদ্ধে ৰাইজৰ ৰায় ।"

লগতে তেওঁ কয়,"এই নিৰ্বাচনত সাম্প্ৰদায়িকতাৰ গছজোপা উভালি পৰিল । সাম্প্ৰদায়িক ৰাজনীতিৰ পৰা ৰাইজ মোহভংগ হ'বলৈ আৰম্ভ কৰিছে । বিজেপিৰ প্ৰতি ৰাইজৰ মোহভংগ হৈছে আৰু ই ৰাজনীতিৰ বাবে ইতিবাচক খবৰ । ধৰ্মীয় উন্মদনাৰে আচন্ন কৰি ৰখা পৰিৱেশ শেষ হ'ল । মোদীয়ে এতিয়া আৰু জনতাৰ মুখ বন্ধ কৰি ৰাখিব নোৱাৰিব, গণতন্ত্র নিশেষ কৰাৰ ষড়যন্ত্রত লিপ্ত হ'ব নোৱাৰিব ।"

যোৰহাট লোকসভা সমষ্টিৰ প্ৰসংগত মন্তব্য কৰি গগৈয়ে কয়,"বিজেপি নেতাৰ অহংকাৰৰ পতন ঘটিছে । তপন গগৈ হাৰিলে পীযুষ হাজৰীকাই ৰাজনীতি ত্যাগ কৰিম বুলি কৈছিল । এতিয়া পীযুষ হাজৰীকাই নিজৰ কথা ৰাখিবনে নাৰাখে ? ২০২৪ চনৰ লোকসভা নিৰ্বাচনত ৰাইজে বিজেপিৰ বিৰুদ্ধে ভোটদান কৰাৰ মূল কাৰণ হৈছে হিমন্ত বিশ্ব শৰ্মা আৰু তেওঁৰ সাংগোপাংগোসকলৰ অহংকাৰ । এই অহংকাৰে তেখেতসকলক ডুবাইছে ।"

ভোটাৰ ৰাইজক ধন্যবাদ জ্ঞাপন কৰি তেওঁ কয়,"অসমৰ ৰাইজে বিজেপিৰ সাম্প্ৰদায়িকতাবাদৰ বিৰুদ্ধে বিবেকৰ সংগ্ৰাম গঢ়ি তুলিলে । এয়া জনতাৰ জয় হৈছে ।" ইফালে সৰ্বানন্দ সোণোৱালৰ প্ৰসংগ উল্লেখ কৰি তেওঁ কয়, "ডিব্ৰুগড় লোকসভা সমষ্টিত সৰ্বানন্দ সোণোৱালক হিমন্ত বিশ্ব শৰ্মাই হৰুৱাবৰ কাৰণে চেষ্টা কৰিছিল । নাহৰকটীয়াৰ তৰংগ গগৈৰ সমষ্টিত বহু কম ভোট লাভ কৰিছে । তাৰোপৰি মুখ্যমন্ত্ৰীয়ে চক্ৰান্ত কৰি প্ৰধানমন্ত্ৰীৰ নিৰ্বাচনী প্ৰচাৰৰ কাৰ্যসূচীও বাতিল কৰিছিল । ইমানৰ পিচতো সৰ্বানন্দ সোণোৱালক হৰুওৱাৰ এই চক্ৰান্তত হিমন্ত বিশ্ব শৰ্মা বিফল হ'ল ।" এয়া বিজেপিৰ নৈতিকতাৰ পৰাজয় বুলি মন্তব্য কৰে অখিল গগৈয়ে ।

লগতে পঢ়ক:পৰাজয়ৰ সন্দৰ্ভত কি ক'লে ধুবুৰীৰ তিনিবাৰৰ সাংসদ বদৰুদ্দিন আজমলে ? - Lok Sabha Election 2024