গুৱাহাটী : "ৰাইজে দিয়া জনমতক আমি আদৰণি জনাইছো । অৰবিন্দ কেজৰিৱাল পৰাজয় বৰণ কৰাটো আমাৰ বাবে দুখৰ কথা ।" এই মন্তব্য আম আদমী পাৰ্টী চমুকৈ আপৰ ৰাজ্যিক উপ-সভানেত্ৰী তথা মুখ্য মুখপাত্ৰ অনুৰূপা ডেকাৰজাৰ । দিল্লীত আম আদমী পাৰ্টীৰ শোচনীয় পৰাজয় সন্দৰ্ভত এইদৰে প্ৰতিক্ৰিয়া ব্যক্ত কৰে আপৰ ৰাজ্যিক নেত্ৰীগৰাকীয়ে ।
সংবাদ মাধ্যমৰ আগত প্ৰতিক্ৰিয়া ব্যক্ত কৰি তেওঁ কয়, "ৰাইজৰ ৰায়ক আমি মানি লৈছো । দিল্লীত আপে উন্নয়নৰ ৰাজনীতি কৰা নাই তেনে কথা নহয় । বহুখিনি উন্নয়ন কৰিছে । কিন্তু শেহতীয়া দুই-তিনি বছৰত আম আদমী পাৰ্টীৰ যথেষ্ট ক্ষতি হৈছে । ক্ষতি হোৱাৰ কাৰণবোৰ ভাৰতবৰ্ষৰ ৰাইজে জানে । কিদৰে বিজেপি দলে আমাৰ একো একোজন নেতাক জেলত ভৰাই ৰাখিলে সেয়া ভাৰতৰ ৰাইজে দেখিছে ।’’
অনুৰূপা ডেকাৰজাই কয়, ‘‘বিজেপি দলে তেওঁলোকৰ সাংগঠনিক ভেঁটি তাত তলে তলে নিৰ্মাণ কৰি ল'লে । বিজেপি দলে শেষলৈকে এনেকুৱা ধৰণে কিছুমান বেয়া কাম কৰিলে যিবোৰ কামৰ ফলাফল আজি আমি ভোগ কৰিবলগীয়া হৈছে । অৰবিন্দ কেজৰিৱালে কাম কৰাৰ বাবে ভোট খুজিবলৈ যায় । তেওঁ জনতাক কামৰ বাবেহে ভোট দিবলৈ কৈছিল ।’’
‘‘আজি ভোটিঙৰ অনুপাত চাবলৈ গ'লে দেখা যায় যে বৰ বেছি পাৰ্থক্য নাই । কিন্তু কথা হ'ল যে আজি যিখিনি মানুহে আমাক ভোট দিছে সেইখিনি মানুহে কামৰ ৰাজনীতিৰ বাবেই ভোট দিছে । আমি বিজেপিক অভিনন্দন জনাইছো যদিও এটা কথা ঠিক যে দিল্লীত অৰবিন্দ কেজৰিৱালে কামৰ মাজেৰে নিদৰ্শন দাঙি ধৰিছিল । পৰিৱৰ্তনৰ মাজত হয়টো কিবা ত্ৰুটি থাকি গৈছিল আৰু যাৰ বাবে হয়টো ৰাইজে নতুন দলৰ সন্ধান কৰিলে ।" তেওঁ কয় ৷
তেওঁ লগতে কয়, "দিল্লীত বিজেপিয়ে কি কাম কৰিব সেয়া সকলোৱে দেখিব । প্ৰধানমন্ত্ৰী নৰেন্দ্ৰ মোদীয়ে বিগত সময়ত কি উন্নয়নৰ কাম কৰিছে সেয়া দেশৰ জনগনে দেখিছে । দিল্লীত ২৭ বছৰৰ পাছত তেওঁলোকে সুযোগ পাইছে আৰু সেই সুযোগ ৰাইজে দিছে । ইয়াক আমি মানি লৈছো ।"
আপৰ আন এগৰাকী ৰাজ্যিক নেতাই কয়, "মুখ্যমন্ত্ৰী আতিশীৰ জয়লাভৰ বাবে আমি দুখৰ মাজতো কিছু আনন্দিত হৈছো । নিৰ্বাচনী ফলাফলক লৈ আমি যথেষ্ট দুঃখিত । আম আদমী পাৰ্টী কেৱল মাত্ৰ এটা ৰাজনৈতিক দল নহয়, ই এটা আদৰ্শ । অৰবিন্দ কেজৰিৱালে নিৰাশাৰ মাজত আশাৰ বন্তি জ্বলাবলৈ সক্ষম হৈছিল । আজি আমি হাৰিছো যদিও চিৰদিনৰ বাবে হাৰি যোৱা নাই । আমি নতুন উদ্যমেৰে আকৌ আগুৱাই যাম ।"
