নগাঁও, ১৭ আগষ্ট : ৰাজ্যৰ আন পাঁচটাকৈ বিধানসভা সমষ্টিৰ লগতে নগাঁৱৰ চামগুৰি বিধানসভা সমষ্টিতো অনুষ্ঠিত হ’বলগীয়া উপ-নিৰ্বাচনৰ বাবে তৎপৰতা আৰম্ভ কৰিছে ৰাজনৈতিক দলসমূহে । প্ৰাক্তন মন্ত্ৰী তথা ধুবুৰী লোকসভা সমষ্টিৰ সাংসদ ৰকিবুল হুছেইনে সাংসদ হিচাপে নিৰ্বাচিত হোৱালৈকে প্ৰতিনিধিত্ব কৰিছিল চামগুৰি বিধানসভা সমষ্টিৰ পৰা । কিন্তু ধুবুৰী লোকসভা সমষ্টিৰ পৰা সাংসদ নিৰ্বাচিত হোৱাৰ পাচত চামগুৰি বিধানসভা সমষ্টিৰ পৰা এন এছ ইউ আইত জড়িত নিজৰ পুত্ৰৰ হাতত অৰ্পণ কৰিব বিচাৰিছে সমষ্টিটো ।
সমষ্টিটোৰ উপ-নিৰ্বাচনৰ বাবে কংগ্ৰেছ দলৰ পৰা ৰকিবুল হুছেইনৰ পুত্ৰ তাঞ্জিল হুছেইনৰ নাম একপ্ৰকাৰ চূড়ান্ত হোৱা বুলি চর্চা চলি আছে যদিও বাকী কেৱল আনুষ্ঠানিক ঘোষণা । কিন্তু সমষ্টি পুনৰ নিৰ্ধাৰণৰ পূৰ্বৰ সমষ্টিৰ সীমা অনুযায়ী অনুষ্ঠিত হ’বলগীয়া চামগুৰি বিধানসভা সমষ্টিৰ উপ-নিৰ্বাচনত ৰকিবুল-পুত্ৰক ভেটিবলৈ শাসকীয় দল বিজেপিয়ে ডিপ্লুৰঞ্জন শৰ্মাক প্ৰাৰ্থী হিচাপে একপ্ৰকাৰ ঘোষণা কৰিয়েই সমষ্টিটোত আৰম্ভ কৰিছে নিৰ্বাচনী তৎপৰতা ।
আনহাতে, সমষ্টিটোৰ সংখ্যালঘু ভোটৰ ওপৰতেই অধিক নিৰ্ভৰশীল কংগ্ৰেছৰ বিৰুদ্ধে শক্তিশালী ৰূপত আগবাঢ়িবলৈ আৰম্ভ কৰিছে বদৰুদ্দিন আজমল নেতৃত্বাধীন এ আই ইউ ডি এফ দলো । ধুবুৰী লোকসভা সমষ্টিৰ নিৰ্বাচনত ৰকিবুল হুছেইনৰ হাতত পৰাজয়বৰণ কৰা এ আই ইউ ডি এফ দলে ধুবুৰীৰ পৰাজয়ৰ প্ৰতিশোধ ল'বলৈ চামগুৰি সমষ্টিত শক্তিশালী প্ৰাৰ্থী প্ৰক্ষেপ কৰাৰ সিদ্ধান্ত গ্ৰহণ কৰিছে ।