বিশ্বনাথ/গুৱাহাটী: ১৩ নৱেম্বৰত হ’বলগীয়া অসমৰ বিধানসভাৰ উপ-নিৰ্বাচনৰ দিন চমু চাপি অহাৰ লগে লগে বিহালীত গৰম হৈ পৰিছে নিৰ্বাচনী বতাহ । ইয়াৰ মাজতে অসমৰ চাহ জনগোষ্ঠী লোকসকলৰ অন্যতম সংগঠন অসম চাহ জনজাতি ছাত্ৰ সন্থাই বিজেপি দলক মুকলিকৈ সমৰ্থন আগবঢ়াইছে । আটছাই এইবাৰ মুকলিকৈ সমৰ্থন জনাইছে বিহালী বিজেপিৰ প্ৰাৰ্থী দিগন্ত ঘাটোৱাললৈ ।
লগতে পঢ়ক:বিহালীত উগ্ৰপন্থীৰ নৰসংহাৰৰ কাহিনী সজীৱ কৰি মুখ্যমন্ত্ৰীৰ নিৰ্বাচনী প্ৰচাৰ
বৃহস্পতিবাৰে বিশ্বনাথ জিলা আটছাৰ সহকাৰী সম্পাদক বিমল দ্বীপসহ বিহালী আটছাৰ বিষয়ববীয়াসকলে চাহ জনগোষ্ঠীৰ নেতাক বিহালী উপ-নিৰ্বাচনত বিজেপি দলে টিকট প্ৰদান কৰাৰ বাবে বিজেপিক ধন্যবাদ জনোৱাৰ লগতে বিহালীৰ আদিবাসী লোকসকলক বিহালী বিজেপিৰ প্ৰাৰ্থী দিগন্ত ঘাটোৱালক ভোট দিবলৈ মুকলিকৈ আহ্বান জনায় । আটছাৰ সহকাৰী সম্পাদক বিমল দ্বীপে সাংবাদিকৰ আগত কয়, “চাহ জনগোষ্ঠী অধ্যুষিত অঞ্চল বিহালী । অসম চাহ জনজাতি ছাত্ৰ সন্থাৰ প্ৰাক্তন কেন্দ্ৰীয় সহঃ সম্পাদক দিগন্ত ঘাটোৱাৰক আজি ভাৰতীয় জনতা পাৰ্টিয়ে প্ৰাৰ্থিত্ব প্ৰদান কৰাত আমি নথৈ আনন্দিত হৈছো । ইয়াৰ বাবে বিজেপিক আমি ধন্যবাদ জনোৱাৰ লগতে বিজেপি দলৰ প্ৰাৰ্থী দিগন্ত ঘাটোৱাৰক আমি শুভেচ্ছা জনাইছো ।"
আনহাতে, কংগ্ৰেছ দলে চাহ জনগোষ্ঠীৰ লোকক প্ৰতাৰণা কৰি নিৰ্বাচনৰ টিকট নিদিয়াৰ অভিযোগ তুলি অসম চাহ জনজাতি ছাত্ৰ সন্থাই কংগ্ৰেছ দলক গৰিহণা দিয়ে । সংগঠনটোৰ নেতাগৰাকীয়ে কয়, “কংগ্ৰেছ দলে চাহ জনজাতি অধ্যুষিত অঞ্চলত চাহ জনগোষ্ঠীৰ লোকক প্ৰাৰ্থিত্ব প্ৰদান নকৰিলে । ইয়াৰ বিপৰীতে অসম চাহ জনজাতি ছাত্ৰ সন্থাৰ প্ৰাক্তন কেন্দ্ৰীয় সহকাৰী সম্পাদক দিগন্ত ঘাটোৱাৰ বিজেপিৰ প্ৰাৰ্থিত্ব লৈ আজি বিহালীলৈ আহিছে । গতিকে আমাৰ নৈতিক অধিকাৰ আছে, সেয়ে আমি অৰাজনৈতিক সংগঠন হৈও কিছু কিছু ক্ষেত্ৰত আমি ৰাজনৈতিক দলক সমৰ্থন কৰিবলৈ বাধ্য হওঁ ।”