গুৱাহাটী, 15 মে’:সোণ প্ৰতিগৰাকী লোকৰ বাবে অতি মূল্যৱান ৷ সোণৰ প্ৰতি ভাৰতীয় লোকৰ পূৰ্বৰে পৰা আকৰ্ষণ আছে ৷ কিন্তু সোণৰ দাম দিনে দিনে ব্যাপক হাৰত বৃদ্ধি পাইছে ৷ দাম বৃদ্ধি হোৱাৰ লগে লগে সোণ লগত বা পিন্ধি ৰখাটো সমস্যাৰ সৃষ্টি হৈছে ৷ কিয়নো চোৰ ডকাইতে প্ৰথমে সোণকে লক্ষ্য কৰি লয় ৷ বহুলোকেই সেইবাবেই চিন্তিত যে তেওঁলোকে তেওঁলোকৰ সাঁচতীয়া ধনেৰে ক্ৰয় কৰা সোণখিনি চোৰ ডকাইতে যদি লৈ যায় তেন্তে তেওঁলোক সৰ্বস্বান্ত হৈ পৰিব ৷
বিশেষকৈ গুৱাহাটী মহানগৰীত সোণ পিন্ধাটো বিপজ্জনক হৈ পৰিছে ৷ কেৱল বাহিৰতে নহয় ঘৰতো আজিৰ দিনত সুৰক্ষিত নহয় আপোনাৰ মূল্যৱান সোণ ৷ যাৰ বাবে এতিয়া ডিজিটেল সোণৰ প্ৰতি আগ্ৰহী হৈছে গ্ৰাহক ৷ ডিজিটেল সোণৰ সুবিধা আৰু ব্যয়সাধ্যতাৰ বাবে দ্ৰুতগতিত ক্ৰেতাৰ পচন্দৰ হৈ পৰিছে ৷ ডিজিটেল পেমেণ্টৰ বাবে চৰকাৰে সুবিধা কৰি দিয়া, ডিজিটেলাইজেচন সম্প্ৰসাৰণ, অনলাইনত সোণ ক্ৰয় কৰাত সহজ হৈ পৰিছে ৷ সেয়ে বৰ্তমান বহু মানুহে ডিজিটেল সোণৰ দৰে আধুনিক সম্পদৰ ৰূপত বিনিয়োগ কৰিবলৈ বাছি লৈছে ৷ কাৰণ এই সোণ সাধাৰণ সোণতকৈ কিছু পৃথক ৷
সেয়ে এতিয়া উত্তৰ পূৰ্বাঞ্চলৰ বিপনীত আৰম্ভ হৈছে ডিজিটেল সোণৰ সুবিধা ৷ প্ৰতিদিনে ১ টকাৰ পৰা ১ লাখ ৯৯ হাজাৰ টকালৈকে ডিজিটেল সোণৰ ক্ৰয় কৰিব পৰা ব্যৱস্থা কৰিছে ৷ সেয়ে এতিয়া ডিজিটেল সোণৰ সুবিধা আৰু ব্যয়সাধ্যতাৰ বাবে দ্ৰুতগতিত ক্ৰেতাৰ পচন্দও হৈ পৰিছে । ভাৰতত সোণত বিনিয়োগৰ পৰিৱেশ পৰম্পৰাগত ভৌতিক ৰূপৰ পৰা ডিজিটেল ফৰ্মেটলৈ সলনি হৈছে । এই পৰিৱৰ্তন সোণ ভিত্তিক এক্সচেঞ্জ ট্ৰেডেড ফাণ্ড (ইটিএফ) পৰ্টফলিঅ'ৰ সংখ্যা বৃদ্ধিৰ জৰিয়তে দেখা গৈছে, যিটো চাৰি বছৰত ১৫গুণ বৃদ্ধি পাইছে । ভাৰতত ২০১৫ চনৰ পৰা ৬১ টা ট্ৰেঞ্চ ছ'ভাৰেইন গোল্ড বণ্ড (এছজিবি)ও দেখা গৈছে আৰু এক কথাত ক’বলৈ গ’লে বিপনীৰ পৰা সোণ ক্ৰয় কৰি ঘৰত অসুৰক্ষিতভাৱে সাঁচি ৰখাতকৈ বহুতে এটিয়া ডিজিটেল সোণ ক্ৰয় কৰাটো বৰ্তমান সময়ত অধিক সুৰক্ষিত ৷