নেশ্যনেল ডেস্ক,১৫ মাৰ্চ :উচ্চতম ন্যায়ালয়ৰ নিৰ্দেশনাৰ পিচতে ভাৰতীয় ষ্টেট বেংকে নিৰ্বাচনী বণ্ডৰ সকলো তথ্য নিৰ্বাচন আয়োগক প্ৰদান কৰিছে । একেদৰে নিৰ্বাচন আয়োগেও ৱেবছাইটত কিমান টকাৰ বিনিময়ত নিৰ্বাচনী বণ্ড ক্ৰয় কৰা হৈছিল তাৰ সকলো তথ্য আপলোড কৰিছে । ১০ কোটি টকাৰ অধিক মূল্যৰ নিৰ্বাচনী বণ্ড ক্ৰয় কৰাসকলৰ তালিকাত ২১৩ গৰাকী লোক আছে ।
নিৰ্বাচন আয়োগৰ পৰা তথ্য মুকলি হোৱাৰ পিচতে এটা এনেকুৱা নাম প্ৰকাশ পাইছে যাক দেখি সকলো হতবাক হৈ পৰিছে । কিয়নো সৰ্বাধিক টকাৰ নিৰ্বাচনী বণ্ড কৰা ব্যক্তিজন হৈছে এজন লটাৰী কিং । এসময়ত শ্ৰমিক হিচাপে আছিল আৰু পিচত লটাৰী কিং বুলি জনাজাত হ'ল । এতিয়া তেওঁ সৰ্বাধিক মূল্যৰ নিৰ্বাচনী বণ্ড ক্ৰয় কৰা ব্যক্তি হিচাপে দেশত আলোড়নৰ সৃষ্টি কৰিছে । তেওঁৰ নাম ছান্টিয়াগো মাৰ্টিন । ছান্টিয়াগো মাৰ্টিনৰ কোম্পানী ফিউচাৰ গেমিং এণ্ড হোটেল চাৰ্ভিচেছ প্ৰাইভেট লিমিটেডে সৰ্বাধিক মূল্যৰ নিৰ্বাচনী বণ্ড ক্ৰয় কৰিছে ।
ফিউচাৰ গেমিং এণ্ড হোটেল চাৰ্ভিচেছ প্ৰাইভেট লিমিটেড নামৰ তেওঁৰ প্ৰতিষ্ঠানটোৱে ৰাজনৈতিক দলসমূহক সৰ্বাধিক পৰিমাণৰ অনুদান দিয়া কথাটোৱে এতিয়া দেশত তীব্ৰ প্ৰতিক্ৰিয়াৰ সৃষ্টি কৰিছে ।
কিয়নো তেওঁৰ বিৰুদ্ধে বিভিন্ন ধৰণৰ কেলেংকাৰীৰ অভিযোগ আছে । ২০২১ চনত তামিলনাডুৰ প্ৰাক্তন কংগ্ৰেছ মুৰব্বী আলাগিৰিয়ে অভিযোগ কৰিছিল যে মাৰ্টিনে বিধানসভা নিৰ্বাচনৰ প্ৰাকমুহূৰ্তত বিজেপিক ৮৩ শতাংশ অনুদান দিছিল আনহাতে ৰাজনৈতিক দলসমূহক দিয়া মুঠ অনুদান আছিল ২৪৫.৭ কোটি টকা ।
নিৰ্বাচনী নিৰীক্ষণ সংস্থা এচোছিয়েশ্যন ফৰ ডেমক্ৰেটিক ৰিফৰ্মছ (এডিআৰ)ৰ প্ৰতিবেদন একপ্ৰকাৰ স্পষ্ট হৈ পৰিছে যে ভাৰতীয় জনতা পাৰ্টীয়ে (বিজেপি) ২০২২-২৩ বৰ্ষত একত্ৰিত হোৱা ৬৮০.৪৯ কোটিৰ সকলো কৰ্পোৰেট অনুদানৰ প্ৰায় ৯০ শতাংশ লাভ কৰিছিল । ফিউচাৰ গেমিং এণ্ড হোটেল চাৰ্ভিচেছ প্ৰাইভেট লিমিটেড ২০১১ ৰ পৰা ২০১৯ ৰ ভিতৰত ১৩৬৮ কোটি টকাৰ অনুদান দিয়াৰ কথা স্পষ্ট হৈ পৰিছে ।